ننګرهار پوهنتون کې د کرکټ سیالۍ پیل شوې.
د کرکټ سياليو یاد لس اوریزه ټورنمنټ، چې نږدې یوه میاشت به دوام وکړي، د ننګرهار پوهنتون د سپورت او بدني روزنې امريت له خوا د دې پوهنتون د اړوندو پوهنځيو او پوهنتون فامیلیو ۱۵ لوبډلو ترمنځ پیل شو.
د کرکټ یادو سیالیو پرانیسته د ننګرهار پوهنتون د محصلانو چارو مرستیال او د یاد معاونیت اړوندو آمرینو په حضور کې وشوه.
د ننګرهار پوهنتون د محصلانو چارو مرستیال مولوي عبیدالله عابد د محصلینو تر منځ ورزشي سیالۍ د هغوی فزیکي وړتیاوو ودې، یووالي او تفریح لپاره اړینې وبللې.
نوموړي لوبېدونکو لوبډلو ته سپارښتنه وکړه، چې د سپورتي اصولو او متقابل احترام په پام کې نیولو سره لوبې ترسره کړي.
د پوهنتون د سپورت او بدني روزنې آمر مولوي نصیراحمد عباس وویل، د کرکټ ټورنمنټ دایرېدو څخه یې موخه د محصلینو بدني او ذهني روغتیا تامین او هغوی لپاره د سالمې بوختیا رامنځ ته کول دي.
د ټورنمنټ په لومړۍ ورځ د عامه ادارې او پالیسۍ پوهنځي لوبډلې د ساینس پوهنځي لوبډلې او ستوماتولوژي پوهنځي لوبډلې د وترنري علومو پوهنځي لوبډلې پر وړاندې سیالۍ ترسره کړې.
سرچینه : د اطلاعاتو، نشراتو او عامه اړیکو امریت
