ننګرهار پوهنتون کې استادانو او اداري کارکوونکو ته جوړ شوی ۳ ورځنی سيمینار پای ته ورسېد.
د لوړو زده کړو وزارت د دعوت او ارشاد ریاست له خوا د ننګرهار پوهنتون او خصوصي پوهنتونونو استادانو او اداري کارکوونکو ته جوړ شوی درې ورځنی ديني او علمي سيمینار په دعا سره پای ته ورسېد.
د یاد سيمینار پر مهال چې په کې د ننګرهار پوهنتون مشرتابه او استادانو سربېره د خراسان، التقوی، تابش، سپین غر، روښان، الفلاح، اریانا او امیر علي شېر نوايي پوهنتونونو رهبرۍ، استادانو، د دعوت او ارشاد مسؤلینو او اداري کارکوونکو ګډون کړی و، په ترڅ کې یې د هېواد مشهورو او جیدو شیوخو او علماء کرامو پر مختلفو دیني، علمي او اصلاحي موضوعاتو بحث او معلومات وړاندې کړل.
د یاد درې ورځني سيمینار په ترڅ کې علماء کرامو اخلاص، زهد، تقوا او د نیت اصلاح، د ایمان تعریف او د شعبو بیان یې، د نبي کریم صل الله علیه وسلم د سنتو اتباع او د هغې اهمیت، د ږیرې اهمیت او منزلت په اسلام کې، په اسلام کې د ښځو مقام، حقوق، واجبات او حجاب، د کفر تعریف او اقسام یې، ولاء او براء، د امیر ټاکنې حکم، د امیر حقوق او اطاعت، د اسلامي نظام اهمیت،فوائد، اهداف او حفاظت، د امام ابوحنیفه رحمه الله مناقب او مذهب، د تعصباتو زیانونه، د اسلامي امارت پالیسي، د جهاد فضایل او اهمیت، د مسؤلیت احساس، امانتداري او د خیانت مذمت موضوعات ارایه کړل.
د سيمینار د پای وینا پر مهال د ننګرهار پوهنتون د علمي چارو مرستیال پوهنوال مولوي احسان الله ناصح په بریالي شکل د سیمینار پای ته رسېدو باندې خوښي وښوده او په کې یې د ننګرهار او نورو خصوصي پوهنتونونو له ګډونوالو استادانو او اداري کارکوونکو د فعاله ګډون له کبله مننه وکړه.
نوموړي د لوړو زده کړو وزارت د دعوت او ارشاد ریاست یاد ابتکار وستایه او راتلونکي کې یې د ورته نورو علمي برنامو د جوړولو غوښتنه وکړه.
سيمینار د ننګرهار پوهنتون د شرعیاتو پوهنځي د رئیس م.ولوي کلیم الله ح.قاني په دعا سره پای ته ورسېد.
