ننګرهار پوهنتون کې د ۱۴۰۴ لمریز کال فوق لیسانس برنامو د کانکور ازموینې لپاره د بایومتریک معلوماتو د ثبت بهیر پیل شو.
د ننګرهار پوهنتون شرعیاتو، ژبو او ادبیاتو، اقتصاد او حقوقو پوهنځیو د ماسترۍ ۶ برنامو ته د کانکور ازموینې لپاره د کاندیدانو د بایومتریک پروسه نن سهار په ۷ بجو پیل شوه، چې تر ۴ بجو به دوام وکړي او پر مهال به یې (۴۶۵) تنه بایومتریک شي.
د ننګرهار پوهنتون د علمي چارو مرستیال پوهنوال مولوي احسان الله ناصح او د ازموینو ملي ادارې د پوښتنو بانک رئیس مولوي معلم احمد حقاني په ګډه د بایومتریک پروسې څخه لیدنه وکړه او د بایومتریک ټیم له غړو د مننې تر څنګ یې هغوی ته د یاد بهیر د لا ښه والي او نظم په پار لارښوونې او سپارښتنې وکړې.
د یادونې وړ ده، چې د کانکور یاده ازموینه به سبا ورځ (جمعه) په کرنې پوهنځي کې د سهار په ۶:۳۰ بجو پیل، څلور ساعته به دوام وکړي او په پایله کې به یې د ماسترۍ یادو برنامو ته (۱۸۰) تنه جذب شي.
