د ننګرهار پوهنتون طب پوهنځي د تدریسي خونو د بیارغونې چارې پیل شوې.
په یادو رغنیزو چارو کې د تدریسي خونو د ترمیم تر څنګ د ټولګیو تجهیز هم شامل دی، چې د سپین غر لوړو زده کړو موسسې د نږدې ۷ سوه زره افغانیو په مالي مرسته ترسره کېږي، چې چارې به یې په دوه اوونیو کې بشپړې شي.
د یادو رغنیزو چارو پرانیسته د ننګرهار پوهنتون رئیس پوهاند دوکتور خلیل احمد بهسودوال، د لوړو زده کړو وزارت فوق العاده استازي قاضي خالد صداقت، د سپین غر لوړو زده کړو موسسې رئیس دوکتور محمد اسحق صافي او د طب پوهنځي رئیس پوهنوال محمد عظیم عظیم او د یاد پوهنځي د استادانو له خوا وشوه.
د سپین غر لوړو زده کړو موسسې رئیس دوکتور محمد اسحق صافي په تېر کې له خپلې موسسې سره د تضمین کیفیت، څېړنو، د محصلینو د عملي زده کړو او ستاژ، کانکور ازموینو او د روزنیزو کورسونو د دایرولو په برخو کې د ننګرهار پوهنتون د اکاډمیکې مرستې او همکارۍ یادونه وکړه او د طب پوهنځي سره کېدونکې مرسته یې د د متقابلو همکاریو لړۍ یاده کړه، چې په وینا یې، په راتلونکې کې به هم دوام ولري.
د ننګرهار پوهنتون رئیس پوهاند دوکتور خلیل احمد بهسودوال د پوهنتونونو او علمي مرکزونو تر منځ د متقابلو اړیکو او همکاریو پر ارزښت خبرې وکړې او د سپین غر لوړو زده کړو موسسې له خوا د شوې مرستې د مننې تر څنګ یې زیاته کړه، چې دا د ننګرهار پوهنتون دنده ده، چې د هېواد د دولتي او خصوصي پوهنتونونو او تحصیلي موسسو سره په بېلابېلو علمي او اکاډمیکو برخو کې مرسته او همکاري وکړي.
د ننګرهار د دولتي او خصوصي پوهنتونونو لپاره د لوړو زده کړو وزارت فوق العاده استازي او د ننګرهار پوهنتون د اداري او مالي چارو مرستیال قاضي خالد صداقت د ننګرهار پوهنتون او نورو تحصیلي بنسټونو تر منځ د همکارۍ او همغږۍ په شتون خوښي وښوده او زیاته یې کړه، چې د مسلکي او په معیار برابر کادرونو د روزلو په موخه باید یادې اړیکې لا زیاتې قوي او پیاوړې شي.
سرچینه: د اړیکو، نشراتو او عامه پوهاوي امریت
