په افغانستان کې د ايران اسلامي جمهوریت سفیر د ننګرهار پوهنتون رئيس سره وليدل.
په افغانستان کې د ایران د اسلامي جمهوریت سفیر دوکتور بهادر امینیان په جلال آباد ښار کې د یاد هېواد د جنرال قونسل مجید صادقي دولت آبادي په ملتیا د ننګرهار پوهنتون رئيس پوهاند دوکتور خلیل احمد بهسودوال سره ولیدل.
په ياده لیدنه کې، چې د پوهنتون د علمي چارو مرستیال پوهندوی دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د بهرنیو اړیکو کمېټې مشر پوهنمل دوکتور محمد دوست صافي، د ژبو او ادبیاتو پوهنځي رئیس پوهنمل محمد عارف حازم او د یاد پوهنځي د دري څانګې استادانو هم برخه لرله، دواړو لورو د متقابلو علمي اړیکو د رامنځته کېدو پر شونتیا او پیاوړتیا خبرې اترې وکړې.
د ننګرهار پوهنتون رئيس پوهاند دوکتور خلیل احمد بهسودوال په تېر کې د ايران اسلامي جمهوريت له مرستو او علمي همکاریو مننه وکړه، چې له ننګرهار پوهنتون سره يې په بېلابېلو برخو کې کړي او په راتلونکې کې یې د نوموړي هېواد له پوهنتونونو سره د متقابلو علمي اړیکو د رامنځته کېدو غوښتنه وکړه.
ښاغلي امینیان د ننګرهار پوهنتون مشرتابه ته په اړونده برخه کې د همکارۍ ډاډ ورکړ او ژمنه يې وکړه، چې ډېر ژر به په علمي، تدریسي، څېړنو، مقالو او کتابونو چاپ، تحصیلي بورسونو، علمي سفرونو او نورو بېلابېلو برخو کې د ننګرهار پوهنتون او د ایران د معتبرو پوهنتونونو تر منځ د اړیکو رامنځته کېدو په برخه کې اقدامات تر سره کړي.
د مجلس په پاى کې راغلي پلاوي د ژبو او ادبیاتو پوهنځي د دري څانګې نه ليدنه وکړه او د یادې څانګې د تجهیز په اړه یې د څانګې استادانو او مسؤلینو سره د همکارۍ ژمنه وکړه.
