د لوړو زده کړو وزارت علمي معین د ننګرهار پوهنتون د فوق لیسانس برنامو بیاکتنه او ارزونه وکړه.
د لوړو زده کړو وزارت علمي معین دکتور لطف الله خیرخواه ننګرهار پوهنتون ته د خپل کاري سفر په ترڅ کې ددې پوهنتون د علمي چارو مرستیال پوهنمل احسان الله ناصح په ملتیا د ننګرهار پوهنتون د ماسترۍ او دکتورا د ۷ برنامو علمي او تدریسي چارې له نږدې ولیدې او د یادو پروګرامونو د څارنې او ارزونې تر څنګ یې د هغو د لا زیات معیاري کېدو او غنامندۍ په اړه یې مسؤلینو ته لازمې لارښوونې وکړې.
د لیدنې پر مهال دکتور خیرخواه د فقهې او قانون، تفسير او حديث، قضا او څارنوالۍ، پښتو ژبې او ادب، ادارې او تجارت او عربي ژبې او ادب څانګو د ماسترۍ او د فقهې او قانون څانګې د دکتورا پروګرامونو د نصاب او کریکولم، تدریسي بهیر، درسي صنفونو، کتابتونونو، تحقیق او تیزس لیکنې مراحلو او نورو بېلابېلو برخو ارزونه وکړه.
نوموړي دغه راز د یادو پروګرامونو د مسؤلینو، استادانو او محصلینو سره ولیدل او د هغوی غوښتنې او وړاندیزونه یې واورېدل.
د ننګرهار پوهنتون د علمي چارو مرستیال پوهنمل احسان الله ناصح د یادو پروګرامونو په اړه د لوړو زده کړو وزارت علمي معین ته معلومات ورکړل.
نوموړي وویل: ننګرهار پوهنتون کې د ماسترۍ پروګرام د لومړي ځل لپاره په ١٣٩١ لمريز کال کې د شرعياتو په پوهنځي کې پيل شو. اوس مهال د ماسترۍ شپږ پروګرامونه او یو د دکتورا پروګرام ددې پوهنتون په څلورو پوهنځيو کې فعال دي.
هغه زیاته کړه: د ماسترۍ او دکتورا په یادو پروګرامونو کې د هېواد د بېلابېلو پوهنتونونو او د علمي او دیني مراکزو د علمي کادرونو په ګډون ۴۸۱ تنه په زده کړو بوخت دي او ۸۹۰ تنه یې فارغ کړي، چې د فارغانو په منځ کې نږدې ۳۰۰ تنه د هېواد د بېلابېلو دولتي او خصوصي پوهنتونونو استادان او د علمي کادر غړي دي.
د لوړو زده کړو وزارت علمي معین دکتور لطف الله خیرخواه په ننګرهار پوهنتون کې د فوق لیسانس برنامو د شتون او فعالیت په اړه خوښي وښوده او د پوهنتون د مشرتابه او استادانو یې مننه وکړه، چې په کور دننه یې استادانو او ځوانانو ته د لوړو زده کړو زمینه برابره کړې ده.
نوموړي د یادو علمي برنامو شتون په هېوادنۍ کچه ستر فرصت وباله او زیاته یې کړه، چې د لا زیات معیاري کېدو، پراختیا او پیاوړتیا لپاره به یې هلې ځلې وکړي.
