ننګرهار پوهنتون کې د ماسترۍ دورې کانکور ازموینه واخیستل شوه.
یاده ازموینه د کب په ۲۰مه ددې پوهنتون د ماسترۍ دورې د شپږو برنامو لپاره د ازموینو د ملي ادارې او ننګرهار پوهنتون له خوا د نږدې ۱۵۰۰ تنو کاندیدانو څخه واخیستل شوه.
د ازموینې په پرانیستغونډه کې د ننګرهار پوهنتون رئیس، د لوړو زده کړو وزارت فوق العاده استازي، د پوهنتون د علمي چارو او محصلانو چارو مرستیالانو او استادانو سربېره د ازموینو ملي ادارې راغلي پلاوي برخه لرله.
د غونډې د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال وویل: د کانکور په نننۍ ازموينه کې (۱۴۴۸) تنه کاندیدان برخه لري، چې په دوه حوزو کې ترې د ازموينو د ملي ادارې څخه د راغلي لس کسيز پلاوي او د ننګرهار پوهنتون د پنځوسو تنو استاذانو له خوا ازموینه اخيستل کېږي.
نوموړي وویل: د یادو کاندیدانو له ډلې به (۲۸۰) تنه د ننګرهار پوهنتون د فقهې او قانون، تفسير او حديث، قضاء او څارنوالۍ، پښتو ژبې او ادب، عربي ژبې او ادب او ادارې او تجارت څانګو ماسترۍ پروګرامونو ته لار پیدا کړي.
پوهاند بهسودوال ممتحنو استادانو ته په شفافه توګه د ازموینې اخیستلو سپارښتنه وکړه او زیاته یې کړه، چې هيڅوک حق نه لري، چې په بې ځایه مداخلې سره د کانکور ملي پروسه اخلال او داغداره کړي.
د غونډې دويم ويناوال د ازموينو ملي ادارې څخه د راغلي پلاوي مشر او د یادې ادارې د پوښتنو بانک د انکشاف او انسجام رئیس پوهنمل دوکتور سید روضت الله مجید ؤ، چې د ازموینې په اړه د لنډو معلوماتو سربېره یې د غونډې ګډونوالو ته ډاډ ورکړ، چې د ننګرهار پوهنتون له استاذانو سره په ګډه به د ازموينې په شفافې اخيستنه کې هلې ځلې وکړي.
د غونډې په پاى کې د ټولو ګډونوالو په حضور کې د پوښتنپاڼو د بکسونو قلفونه خلاص او رسماً ازموينه پيل شوه، چې د ننګرهار پوهنتون رئيس او مرستیالانو د ازموینو د ملي ادارې د راغلي پلاوي په ملتيا د ازموينې له صحنې څخه لیدنه وکړه.
