د ننګرهار پوهنتون اداري او تقرر او انفکاک مجلسونه ددې پوهنتون د رئيس پوهاند دوکتور خليل احمد بهسودوال په مشرۍ ترسره شول.
په نوموړو کاري ناستو کې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د پوهنځيو رئيسانو، مرستیالانو او اداري آمرينو په کې برخه لرله، چې د پوهنتون د مالي، اداري، تدریسي او ځینو نورو مسايلو په اړه په کې بحث او خبرې اترې وشوې.
د مجلس د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال په اداري او تحصیلي برخو کې د لوړو زده کړو وزارت د داخلي تفتیش سپارښتنې د مجلس له غړو سره شریکې کړې او په یادو برخو کې د شته ستونزو او نیمګړتیاوو د له منځه وړلو په اړه یې د پوهنځیو او اداري شعباتو مسؤلینو ته جدي سپارښتنې او لازم هدایات وکړل.
د مجلس په دویمه برخه کې په یو لړ نورو متفرقه مسایلو او د ننګرهار او د کونړ سید جمال الدین افغاني پوهنتونونو د تقرر په ۵ کیسونو بحث او خبرې وشوې او له پرېکړو وروسته د بعدي اجرااتو په موخه اړوندو څانګو ته محول شول.
