د ننګرهار پوهنتون یو شمېر محصلینو له نورو بې وزله محصلینو سره د جامو مرسته وکړه.
د ننګرهار پوهنتون د بېلابېلو پوهنځیو هغو محصلینو، چې د محصلانو چارو معاونیت تر چتر لاندې د محصلانو خدمتونو همغږۍ امریت سره هر اړخیزه همکاري لري او د روغتیا نړیوال سازمان د واکسین په برنامه کې کار کوي، د خپلو معاشونو په یوه اندازه پیسو (۴۱) اړمنو محصلینو ته د اختر جامې واخیستې او په دې توګه یې د هغوی لاسنیوی وکړ.
د مرسته کوونکو محصلینو په وینا، له یادې مرستې یې هدف د ورورولۍ او همدردۍ اړیکو پیاوړتیا، د بې وزله محصلینو لاسنیوی او د نورو پوهنتونونو محصلینو ته د یاد ټولنیز مکلفیت د اداینې پیغام لېږدول دي.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي د مرستې د توزیع پر مهال د مرسته کوونکو محصلینو احساس وستایه، دا ډول خیریه کارونه یې د محصلینو تر منځ د اخوت او نږدېوالي لپاره مهم اقدام یاد کړ او هغوی یې وهڅول، چې د خپلمنځي یووالي لپاره د همکارۍ دا ډول روحیه او فعالیتونه جاري وساتي.
