ننګرهار پوهنتون کې د کرکټ لس اوریزه سیالۍ پیل شوې.
د کرکټ سياليو یاد ټورنمنټ، چې یوه میاشت به دوام وکړي، د ننګرهار پوهنتون د سپورت او بدني روزنې آمريت له خوا د دې پوهنتون د اړوندو پوهنځيو او پوهنتون فامیلیو د ۱۴ لوبډلو ترمنځ پیل شو.
د ټورنمنټ د پرانیستې پر مهال د ننګرهار پوهنتون د اداري او مالي چارو مرستیال مفتي نعمت الله اعزازي د سپورت په ارزښت او ګټو خبرې وکړې او سپورتي فعالیتونه یې د محصلینو په فزيکي او ذهني وده کې اغېزمن وبلل.
د پوهنتون د سپورت او بدني روزنې آمر محمد نسیم کاکړ په وینا، د پیل شویو سیالیو څخه یې موخه محصلینو او ځوانانو ته د سالمې بوختیا رامنځته کول دي او لوبغاړو ته یې د سپورتي اخلاقو او اصولو رعایت سپارښتنه وکړه.
د ټورنمنټ په لومړۍ ورځ د کمپیوټر ساینس لوبډلې د وترنري علومو پوهنځي لوبډلې ته ماته ورکړه.
