د ننګرهار پوهنتون مشرتابه ددې پوهنتون د ښوونې او روزنې پوهنځي فعالیتونه وارزول.
د ننګرهار پوهنتون رئیس شـیخ انعام الله مدني د علمي چارو مرستيال پوهندوى مـولوي احسان الله ناصح، د اداري او مالي چارو مرستیال پوهنیار قاضي خالد صداقت او د محصلانو چارو مرستیال پوهنیار حافظ سید محمد قاسم هاشمي په ملتيا د پوهنځيو د فعاليتونو د ارزونې په لړ کې د ښوونې او روزنې پوهنځي د علمي، تدريسي او اداري چارو د کیفیت ارزونه وکړه او د ياد پوهنځي د پرمختګونو، لاسته راوړنو او ستونزو په اړه يې معلومات ترلاسه کړل.
په همدې پار جوړ شوي مجلس کې د ښوونې او روزنې پوھنځي رئيس پوهنمل محمد اسحق شهيدزوی د پوهنتون رهبرۍ ته د تېرو ۳ کلونو په لړ کې په علمي، تدريسي، اداري او رغنيزه برخه کې د ترسره کړيو چارو او پرمختګونو په اړه معلوماتي پرېزنټېشن وړاندې کړ.
نوموړي د پوھنځي تشکيل، علمي او ظرفيت لوړونې برنامو، محصلينو عملي زده کړو، څېړنيزو هڅو، علمي تواميتونو، په ملي او نړيواله کچه د استادانو نشر شويو مقالو، د پوهنځي او څانګو پر ستراتيژيک پلانونو، تضمين کيفيت اړوند کړنو، لابراتواري تجهيزاتو او راتلونکو پلانونو په اړه خبرې وکړې او د پوهنځي د پرمختګ پر وړاندې پراته خنډونه، ستونزې او خپل وړانديزونه يې د پوهنتون له مشرتابه سره شريک کړل.
د ننګرهار پوهنتون رئيس شيخ انعام الله مدني د خپلو خبرو پر مهال د ښوونې او روزنې پوهنځي مسؤلينو ته د ستونزو د حل ډاډ ورکړ او په چارو کې په همغږي اوسېدو، آمرينو اطاعت، لاس لاندې کارکوونکو سره غوره چلند کولو او حاضرۍ باندې يې ټينګار وکړ.
نوموړي وويل: د پوهنځيو د چارو معياري کېدا، موثريت او ستونزو لمنځه وړلو په موخه يې هڅې پيل کړي، چې د استادانو او محصلينو تدريسي او زده کړه ييز بهير ښه والي برخه کې به د پام وړ مثبت بدلون راولي.
د ننګرهار پوهنتون د علمي چارو، اداري او مالي چارو او محصلانو چارو مرستيالانو د خپلو خبرو پر مهال د ياد پوهنځي په بېلابېلو برخو کې شته نيمګړتياوو ته مسؤلين متوجه کړل او د پوهنځي مسؤلينو ته يې د ستونزو د حل په برخه کې د همکارۍ ډاډ ورکړ.
د مجلس په پای کې د پوهنتون رهبرۍ د ښوونې او روزنې پوهنځي د مختلفو څانګو او مدیریتونو د چارو ارزونه وکړه.
سرچينه: د اطلاعاتو، نشراتو او عامه اړيکو آمريت
