د ننګرهار پوهنتون او التقوی لوړو زده کړو موسسې تر منځ د ماسترۍ برنامو په برخه کې د ګډو همکاریو هوکړه لیک لاسليک شو.
د مسؤلينو په وينا، د ياد تفاهملیک له مخې به ننګرهار پوهنتون د التقوی لوړو زده کړو موسسې د حقوقو او سیاسي علومو او اقتصاد پوهنځیو کې د ماسترۍ د نویو برنامو د ایجاد په برخه کې همکاري کوي.
یاد هوکړه لیک د ننګرهار پوهنتون د علمي چارو مرستیال پوهندوی مـ/ـولوي احسان الله ناصح او د التقوی لوړو زده کړو موسسې د رئیس ښاغلي خوشحال جواد له خوا لاسلیک شو.
د التقوی لوړو زده کړو موسسې رئیس ښاغلي خوشحال جواد په تېر کې له خپلې تحصیلي موسسې سره د ننګرهار پوهنتون د اکاډمیکې مرستې او همکارۍ یادونه وکړه او د مننې تر څنګ يې په راتلونکې کې د هغې پر دوام ټینګار وکړ.
د ننګرهار پوهنتون د علمي چارو مرستیال پوهندوی مـ/ـولوي احسان الله ناصح د پوهنتونونو او تحصیلي بنسټونو تر منځ د متقابلو اړیکو او همکاریو پر ارزښت خبرې وکړې او نوموړي ته یې په اړونده برخه کې د مرستې او همکارۍ ډاډ ورکړ.
د یادونې وړ ده، چې د یاد تفاهم لیک د لاسلیک پر مهال د ننګرهار پوهنتون د مالي او اداري چارو مرستیال پوهنیار قاضي خالد صداقت او د یادې موسسې یو شمېر مسؤلینو هم برخه لرله.
سرچینه: د عامه اړیکو، اطلاعاتو او نشراتو آمریت
