د ننګرهار پوهنتون د ازموینو مرکزي کمېټې ددې پوهنتون د محصلانو چارو مرستیال په مشرۍ غونډه وکړه.
په نوموړې کاري ناسته کې د روانو نهايي ازموینو د څرنګوالي، نظارت او د ازموینو بهیر د روڼتیا او شفافیت په اړه بحث او خبرې وشوې.
د ننګرهار پوهنتون د محصلانو چارو مرستیال پوهنیار حافظ سید محمدقاسم هاشمي د ازموینو کمېټې د تېرو کړنو او فعالیتونو مننه وکړه، چې له امله یې د پوهنتون ازموینې تر ډېره بریده رڼې او معیاري شوي او د اصولو او مقرراتو سره سم یې په راڼه او شفاف ډول د پاتې ازموینو د اخیستلو سپارښتنه وکړه.
نوموړي د لوړو زده کړو وزارت د اصولو او د ازموینو کمېټې د کړنلارې سره سم د ازموینو د اخیستلو، نظارت او د پوهنځیو د ازموینو کمېټو د چارو د څارنې سپارښتنه وکړه.
د ازموینو مرکزي کمېټې مشر پوهاند دوکتور عبدالحی مقیم د محصلانو چارو مرستیال ته ډاډ ورکړ، چې د کمېټې د غړو په مرسته په منظمه توګه د ازموینو د اخیستلو بهیر څارنه کوي او د اصولو سره سم د ازموینو بهیر جریان لري.
د یادونې وړ ده، چې د لوړو زده کړو وزارت د طرحې او د ننګرهار پوهنتون د علمي شورا د پرېکړې له مخې ددې پوهنتون د روان تحصیلي کال د دویم سمستر نهايي ازموینې د جوزا په لومړۍ نېټه پیل شوي او درې اوونۍ به دوام وکړي.
سرچینه: د عامه اړیکو، اطلاعاتو او نشراتو آمریت
