ننګرهار پوهنتون کې د فوټبال سیالۍ د اقتصاد پوهنځي په بریا پای ته ورسېدې.
د فوټبال سياليو یاد ټورنمنټ دوه اوونۍ وړاندې د ننګرهار پوهنتون د بدني روزنې آمريت له خوا ددې پوهنتون د اړوندو پوهنځيو د ۱۱ لوبډلو ترمنځ پیل شوی ؤ.
د پوهنتون د سپورت او بدني روزنې آمر محمد نسیم کاکړ وویل: له یادو سیالیو یې موخه محصلینو او ځوانانو ته د سالمې بوختیا رامنځته کول او دغه راز د نوي تحصیلي کال لپاره د پوهنتون د فوټبال منتخبې لوبډلې ټاکل ؤ.
د ښاغلي کاکړ په وینا، د سیالیو پایلوبې ته د اقتصاد او طب پوهنځیو لوبډلو لار پیدا کړه، چې د اقتصاد پوهنځي لوبډلې وکولای شو، چې ۳ د ۲ پر وړاندې ګولونو وهلو سره د یادو سیالیو اتلولي په خپل نوم کړي او په دې توګه د اقتصاد پوهنځي لوبډلې لومړی او د طب پوهنځي لوبډلې دویم مقام خپل کړ.
د ټورنمنټ د پای په مراسمو کې د ننګرهار پوهنتون د علمي چارو مرستیال پوهندوی احسان الله ناصح، د طب پوهنځي رئیس پوهنوال دوکتور محمد عظیم عظیمي، د اقتصاد پوهنځي رئیس پوهنمل محمد صادق رهنما، د عامه ادارې او پالیسۍ پوهنځي رئیس پوهنمل محمد جمال شینواري او د یادو او د پوهنتون د نورو بېلابېلو پوهنځیو استادانو برخه لرله، چې د سیالیو ګټونکې لوبډلې او غوره لوبغاړو ته یې ستاینلیکونه، کپونه، مډالونه او نورې ډالۍ ورکړې.
