ننگرهار والي له ننګرهار پوهنتون څخه لیدنه وکړه
د ولسمشر ستر سلاکار او د ننګرهار والي ضیاالحق امرخېل د ولایتي ادارې د یو شمېر مسؤلینو په ملتیا د ننګرهار پوهنتون له مشرتابه، استادانو او محصلینو سره له لیدنې سربېره د پوهنتون د بېلابېلو برخو څخه لیدنه وکړه.
په همدې مناسبت د پوهنتون په ریاست مقام کې غونډه جوړه شوې وه، چې د پوهنتون د مشرتابه سربېره په کې د بېلابېلو پوهنځیو رئیسانو، د علمي شورا غړو او اداري آمرینو برخه لرله.
د ننګرهار پوهنتون رئیس پوهاند دوکتور خلیل احمد بهسودوال د پرانیستې او ښه راغلاست وینا پر مهال د پوهنتون د فعالیتونو او لاسته راوړنو په اړه د ننګرهار والي او ورسره پلاوي ته معلومات ورکړل او همدارنګه یې د پوهنتون ستونزې له نوموړي سره شریکې کړې.
ننګرهار والي ضیاالحق امرخېل په پوهنتون کې د رامنځته شویو اصلاحاتو او لاسته راوړنو په اړه خوښي وښوده او د ستونزو په اړه يې وویل، چې د پوهنتون د ستونزو د حل او لا پرمختګونو په موخه یې ولسمشر او د لوړو زده کړو وزیر سره ناستې کړې او ډاډ یې ورکړ، چې په ولایتي او مرکزي کچه به د پوهنتون هر ډول ستونزو حل او پرمختګ لپاره کار وکړي .
هغه زیاته کړه: د پوهنتون د نیمګړو دریو پوهنځیو ودانیو پاتې چارو بشپړېدو په موخه یې وړاندیز کړی، چې د ملي پراختیا ادارې له لوري ترسره شي؛ همدا راز یې د ښوونې او روزنې او طب پوهنځیو په اړه د جلا، جلا پوهنتون کېدو وړاندیزونه کړي .
ښاغلي امرخېل هیله وښوده، چې په راتلونکې مالي کال کې به د پوهنتون لپاره اساسي کارونه وشي، چې په کې د استادانو ښارګوټي فعالېدو، غصب شویو ځمکو بېرته را ګرځېدو، پوهنتون ته په ټولو برخو کې پراختیا ورکول او نور شامل دي .
د ننګرهار والي ډاډ ورکړ چې د پوهنتون سره په ټول قوت همکار دی او هڅه به وکړي چې شته ټولو ستونزو ته یې په وخت رسیده ګي وکړي .
ښاغلي امرخېل د پوهنتون د مشرتابه په ملتیا د محصلینو له استازو سره ولیدل او د هغوی ستونزې او وړاندېزونه یې هم واورېدل او همدارنګه یې د پوهنتون د یو شمېر ودانیزو پروژو څخه لیدنه وکړه.
