ننګرهار پوهنتون ۳۹ تنه ممتاز محصلین وستايل.
د ننګرهار پوهنتون محصلانو خدمتونو همغږۍ امريت د ۱۴ ګونو پوهنځيو هغه محصلین، چې د تېر سمستر نهايي ازموینو په پايله کې يې د خپلو پوهنځيو په کچه لوړې نومرې اخيستې وې، د يوې غونډې په ترڅ کې وستايل.
په ياده ستاینغونډه کې د ننګرهار پوهنتون د محصلانو چارو، اداري او مالي چارو، څېړنو او علمي مجلو مرستيالانو سربېره د مختلفو پوهنځيو رئيسانو، اداري امرينو او ګڼو محصلينو ګډون کړی و.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي په خپله وينا کې په اداره کې د مکافاتو او مجازاتو د اصل پر ارزښت خبرې وکړې او محصلينو ته يې ددې ستر وياړ له امله، چې د خپلو پوهنځيو په کچه ځلېدلي او لوړې نومرې يې اخيستي، مبارکي وويله.
نوموړي محصلین خپلو مسؤلیتونو ته متوجه کړل او سپارښتنه يې وکړه، چې د ممتاز محصل ګټلي مقام ساتنې لپاره دې دوامداره هڅې وکړي.
د کرنې پوهنځي رئيس پوهنمل طيب الله زاهد، د ننګرهار پوهنتون د فرهنګي کمېټې مشر پوهندوی دوکتور همايون حامد او د محصلانو خدمتونو همغږۍ آمر قاري بشير احمد احمدي د ممتازو محصلينو تحصيلي ھڅې او کوښښونه وستايل او سپارښتنه يې ورته وکړه، چې وخت بې ځایه تېر نه کړي او د خپلو درسونو تر څنګ د نوې ټکنالوژۍ څخه په ګټې اخيستنې مطالعه او تحقيق وکړي، چې له فارغېدو وروسته ټولنې ته د ښو کادرونو په توګه د خدمت جوګه شي.
غونډه ممتازو محصلينو ته د ستاینلیکونه په ورکولو سره پای ته ورسېده.
