ننګرهار پوهنتون کې د ۱۴ کادري بستونو لپاره له ۷۴ تنو کاندیدانو ازموینه واخیستل شوه.
یاده ازموینه د ننګرهار، کونړ سید جمال الدین افغاني او لغمان پوهنتونونو د عامه ادارې او پالیسۍ، وترنري علومو، ښوونې او روزنې، ژبو او ادبیاتو، کرنې او اقتصاد پوهنځيو بېلابېلو څانګو ته د اړوندو برخو وړ اشخاصو څخه واخيستل شوه.
دغه کادري ازموينه د لوړو زده کړو وزارت د استادانو د تقرر او علمي ترفيعاتو رياست او د ننګرهار پوهنتون ګډ پلاوي په حضور کې د ټاکل شوي ممتحنه هیئت له خوا په کرنې پوهنځي کې واخیستل شوه.
د ننګرهار پوهنتون رئیس شیخ انعام الله مدني، د علمي چارو مرستیال پوهندوی مولوي احسان الله ناصح، لوړو زده کړو وزارت څخه د راغلي پلاوي مشر او د استادانو د تقرر او علمي ترفیعاتو ریاست د خصوصي تقرر آمر ښاغلي نور احمد بلال د ازموینې اخیستلو له بهیر څخه لیدنه او څارنه وکړه.
نوموړو په خپلو خبرو کې د ازموینې ګډونوالو ته ډاډ ورکړ، چې د ازموينې د روڼتیا او شفافیت په برخه کې یې تر ممکنه حده هلې ځلې کړي او د عدالت له مخې به حق حقدار ته وسپاري.
