ننګرهار پوهنتون کې د ۱۴۰۳ تحصيلي کال کانکور ازموينې د اخيستلو بهیر په بریالیتوب سره پای ته ورسېد.
د کانکور د بایومتریک او ازموینې پروسه د چنګاښ/ سرطان په ۱۲ مه نېټه پیل او تر ۱۶مې نېټې یې دوام وکړ، چې د ۵ ورځو په موده کې پرته له کومې جزوي او جدي ستونزې پای ته ورسېده.
د یادې ازموینې په ترڅ کې د ننګرهار ولايت د دولسمو او څوارلسمو ټولګيو له (۸۹۳۷) تنو فارغانو ازموينه واخيستل شوه.
یاده ازموينه د ازموينو ملي ادارې څخه د راغلي پلاوي او د ننګرهار پوهنتون استادانو له خوا په پوره روڼتیا او شفافیت واخیستل شوه.
د ازموینې ملي ادارې څخه د راغلي پلاوي مشر مــ/ولوي معلم احمد حـ/ـقاني د مخه ښې پر مهال د ننګرهار پوهنتون د مشرتابه، استادانو او اداري کارکوونکو مننه وکړه، چې د بایومتریک او ازموینې پروسې په نـظم، دسپلین، شفافیت او بریالۍ اخیستنه کې یې نه ستړې کېدونکې هلې ځلې وکړې او هم یې په ښه توګه د دوی مېلمه پالنه وکړه.
نوموړي وویل:د ازموینو ملي اداره هڅه کوي، چې د کانکور پایلې د راتلونکې زمري / اسد میاشتې په اوایلو کې اعلان کړي.
د ننګرهار پوهنتون رئيس شــ/یخ انعام الله مدني د کانکور ازموینې په بریالۍ اخیستنه خوښي وښوده او یاده چاره یې د ازموینې ملي ادارې د راغلي ټیم او د ننګرهار پوهنتون د استادانو سربېره د ننګرهار ولایت مقام او امنیتي ځواکونو د هڅو او هلو ځلو پایله وبلله.
نوموړي د کانکور ازموینه یوه سرتاسري ملي پروسه یاده کړه، چې په وینا یې، د هېواد د ځوان کهول هیلې ورسره تړلي او تمه یې څرګنده کړه، چې په بشپړاوي سره به یې حق حقدار ته وسپارل شي.
سرچینه: د عامه اړیکو، اطلاعاتو او نشراتو آمریت
