ننګرهار پوهنتون کې د کرکټ سیالۍ پیل شوې.
د کرکټ سياليو یاد لس اوریزه ټورنمنټ، چې ۲۰ ورځې به دوام وکړي، د ننګرهار پوهنتون د سپورت او بدني روزنې امريت له خوا د دې پوهنتون د اړوندو پوهنځيو او پوهنتون فامیلیو د ۱۴ لوبډلو ترمنځ پیل شو.
د کرکټ یادو سیالیو پرانیسته د ننګرهار پوهنتون د محصلانو چارو مرستیال او د یاد معاونیت اړوندو آمرینو په حضور کې وشوه.
د ننګرهار پوهنتون د محصلانو چارو مرستیال پوهنیار حافظ سید محمد قاسم هاشمي د محصلینو تر منځ ورزشي سیالۍ د هغوی فزیکي وړتیاوو ودې، یووالي او تفریح لپاره اړینې وبللې.
نوموړي لوبېدونکو لوبډلو ته سپارښتنه وکړه، چې د سپورتي اصولو او متقابل احترام په پام کې نیولو سره لوبې ترسره کړي.
د پوهنتون د سپورت او بدني روزنې آمر محمد نسیم کاکړ په وینا، د کرکټ ټورنمنټ دایرېدو څخه یې موخه د محصلینو بدني او ذهني روغتیا تامین او هغوی لپاره د سالمې بوختیا رامنځ ته کول دي.
د ټورنمنټ په لومړۍ ورځ دوه سیالۍ ترسره شوې، چې په کې د ساینس پوهنځي لوبډلې د ژبو او ادبیاتو پوهنځي لوبډلې ته او د وترنري علومو پوهنځي لوبډلې د حقوقو او سیاسي علومو پوهنځي لوبډلې ته ماتې ورکړه.
