ننګرهار پوهنتون کې د کرکټ سیالۍ پیل شوې.
د کرکټ سياليو یاد ټورنمنټ، چې دوه اوونۍ به دوام وکړي، د ننګرهار پوهنتون د سپورت او بدني روزنې آمريت له خوا د دې پوهنتون د اړوندو پوهنځيو او پوهنتون فامیلیو د ۱۴ لوبډلو ترمنځ پیل شو.
د ټورنمنټ د پرانیستې پر مهال د ننګرهار پوهنتون د محصلانو چارو آمر مولوي سعید الله عــــمــــــــري د سپورت په ارزښت او ګټو خبرې وکړې او سپورتي فعالیتونه یې د محصلینو په فزيکي او ذهني وده کې اغېزمن وبلل.
د پوهنتون د سپورت او بدني روزنې آمر محمد نسیم کاکړ د پیل شویو سیالیو په اړه وویل، چې له دې سیالیو یې موخه محصلینو او ځوانانو ته د سالمې بوختیا رامنځته کول دي او لوبغاړو ته یې د سپورتي اخلاقو او اصولو رعایت سپارښتنه وکړه.
د ټورنمنټ په لومړۍ ورځ دوه لوبې ترسره شوې، چې په کې د اقتصاد پوهنځي لوبډلې د ژورنالېزم پوهنځي لوبډلې ته او فامیلیو لوبډلې د انجينرۍ پوهنځي لوبډلې ته ماته ورکړه.
سرچینه : د عامه اړیکو، اطلاعاتو او نشراتو امریت
