د ننګرهار پوهنتون علمي کادر غړو ته د تدریس مېتودولوژي ورکشاپ دایر شو.

د ننګرهار پوهنتون علمي معاونیت له خوا د مسلکي زده کړو پرمختیايي مرکز (PDC) کې د دې پوهنتون د څوارلس ګونو پوهنځیو نویو ګمارل شويو علمي کادر غړو ته د تدریسي مهارتونو د پیاوړتیا او ښوونې معیاري کړنلارو لا ښه تطبیق په موخه دوه ورځنی ورکشاپ دایر شو.
د مسؤلینو په وینا، د دې ورکشاپ په ترڅ کې به د معیاري تدریس ابتدایي مسایل وړاندې او راتلونکي کې به د نورو ورکشاپونو په مرسته استادانو ته اړونده برخه کې په پرمختللې کچه روزنه ورکړل شي، څو د معاصرو تدریسي روشونو سره په کامله توګه بلد او ظرفیت یې لوړ شي.
د ننګرهار پوهنتون د علمي چارو مرستیال پوهنیار مولوي حبیب الله احمدي د ورکشاپ پرانیستې وینا پر مهال د تدریس کړنلارې پر اهمیت، د غوره استاد پر ځانګړتیاوو او مسؤلیتونو خبرې وکړې او سپارښتنه یې وکړه، چې استادان باید محصلینو ته د زده کړو مناسب چاپېریال برابر کړي، معاصرو درسي مېتودونو څخه دې ګټه واخلي او په خپلو علمي فعالیتونو کې دې نوښتونه رامنځ ته کړي.
د ورکشاپ روزونکي د ننګرهار پوهنتون د ښوونې او روزنې پوهنځي استاد پوهنمل دوکتور حکیم خان حقیار د اجنډا مطابق په لومړۍ ورځ د مؤثره تدریسي کړنلارو او د باکیفیته تدریسي پروسې مخ ته وړلو اړوند موضوعات په هر اړخیزه توګه تشریح او ګډونوالو په ګروپي شکل عملي تمرینونه ترسره کړل.
سرچینه: د نشراتو او عامه اړیکو امریت