ننګرهار پوهنتون کې د کرونا ناروغۍ پر وړاندې د واکسیناسیون لړۍ پیل شوه.
د روغتیايي مسؤلینو په وینا، د یاد کمپاین په ترڅ کې به د ننګرهار پوهنتون سربېره د ننګرهار ولایت خصوصي تحصیلي موسسو استادانو، اداري کارکوونکو او د ښوونځیو ښوونکو ته یاد واکسین تطبیق شي.
په همدې مناسبت د ننګرهار پوهنتون ریاست کې د نوموړي کمپاین پرانیستغونډه جوړه شوې وه، چې د ننګرهار پوهنتون د مشرتابه، مرستیالانو او استادانو سربېره په کې د ننګرهار د عامې روغتیا، یونسیف او WHO مسؤلینو هم برخه لرله.
غونډې ته د وینا پر مهال د ننګرهار پوهنتون رئيس پوهاند دوکتور خلیل احمد بهسودوال د عامې روغتیا او نورو همکارو موسساتو مننه وکړه، چې د پوهنتون استادانو ته یې د کرونا مهلکې ناروغۍ پر وړاندې د واکسین لړۍ پیل کړه.
پوهاند بهسودوال یاد واکسین د روغتیا د نړیوال سازمان څخه تائید شوی وباله، چې په وینا یې، د کرونا ناروغۍ په مخنیوي کې ۹۶ سلنه اغېزمن دی.
نوموړي د پوهنتون له استادانو غوښتنه وکړه، چې د واکسین په تطبیق سره خپل ځان د نوموړې ناروغۍ څخه خوندي کړي.
د ننګرهار د عامې روغتیا رئیس ډاکتر نصیر احمد درانی، په ختیځ کې د یونیسف ادارې د روغتیا برخې متخصص ډاکتر محمد نافع کاکړ او د ننګرهار پوهنتون تدریسي روغتون رئیس پوهندوی ډاکتر همایون چهاردیوال نور ویناوال وو، چې د کرونا ضد تطبیقېدونکي واکسین د نوعیت، اغېز او د تطبیق د مواردو په اړه یې ګډونوالو ته معلومات ورکړل.
د غونډې په وروستۍ برخه کې د ننګرهار پوهنتون رئیس او مرستیالانو ته د نوموړي واکسین په تطبیق سره یاده پروسه رسماً په دې پوهنتون کې پیل شوه.
