ننګرهار پوهنتون کې د نومیالي غازي میرزمان خان څلی پرانیستل شو.
یاد څلی، چې کوچنی تفریحي پارک هم لري، د زماني فاونډیشن په مالي مرسته د تېرو څلورو میاشتو په موده کې جوړ او نن ورځ (یکشنبه د حمل په ۲۲مه) د ننګرهار پوهنتون رئیس پوهاند دوکتور خلیل احمد بهسودوال له خوا په داسې حال کې چې د ننګرهار مرستیال والي پوهنوال ببرک میاخېل او د زماني بنسټ مسؤلینو یې ملتیا کوله، رسماً پرانیستل شو.
د ننګرهار پوهنتون رئیس پوهاند دوکتور خلیل احمد بهسودوال د څلي پرانیستې مراسمو ته د وینا پر مهال وویل: نومیالی او اتل غازي (لوی خان) غازي میرزمان خان د انګریزي ښکېلاک څخه د ګران هېواد د خپلواکۍ او ازادۍ د بېرته ګټلو د لارې هغه سرخېل غازي دي، چې په پوره مېړانه یې د هېواد د بشپړې خپلواکۍ ګټلو په برخه کې سترې کارنامې او سرښندنې کړي او په یاده برخه کې یې برخلیک ساز رول لرلی.
نوموړي وویل: په ننګرهار پوهنتون کې د اتل غازي میرزمان خان په اړه د جوړ شوي علمي سیمینار د پرېکړه لیک سره سم د ننګرهار پوهنتون د بهرنیو اړیکو کمېټې په هلو ځلو او د زماني فاونډېشن په مالي مرسته یاد څلی جوړ شو، چې موخه یې د غازي د کارنامو یاد او د خپل تېر تاریخ او ویاړمنې ماضي سره زمونږ د ځوان نسل اشنا کول دي.
د زماني فاونډېشن مرستیال استاد محب الله اسرار او د غازي میرزمان خان د کورنۍ په استازیتوب د نومیالي غازي لمسی اردلان زماني د غونډې نور ویناوال وو، چې د اتل غازي میرزمان خان په ژوند او کارنامو یې رڼا واچوله او د ننګرهار پوهنتون څخه د مننې تر څنګ یې په راتلونکې کې په نورو علمي او رغنیزو برخو کې د پوهنتون له ادارې سره د مرستې ژمنه وکړه.
د غونډې په وروستۍ برخه کې د پوهنتون د مشرتابه له خوا د زماني فاونډیشن مسؤلین او د څلي او پارک د جوړولو په برخه کې د پوهنتون همکار استادان د ستاینلیکونو او ډالیو په ورکړې سره تقدیر شول.
