ننګرهار پوهنتون کې د انګلیسي ژبې نړیواله ورځ د یوې غونډې په ترڅ کې ونمانځل شوه.
یاده نمانځغونډه ددې پوهنتون د ژبو او ادبیاتو پوهنځي د انګلیسي څانګې او د انګلیسي ژبې او کمپیوټر زده کړو مرکز (ELCLC) په نوښت د محصلینو خدمتونو د انسجام په مرکز کې جوړه شوې وه.
غونډې ته د پرانیستې وینا پر مهال د ننګرهار پوهنتون د علمي چارو مرستیال پوهندوی دوکتور محمد حامد کډوال د ژبو د زده کړې په ارزښت خبرې وکړې او انګلیسي ژبه یې په نړیواله کچه د علومو، فنونو، ټکنالوژۍ او صنعت ژبه یاده کړه، چې په وینا یې له زده کړې پرته یې پرمختګ ناشونی او له ستونزو ډک دی.
د محصلانو چارو مرستیال پوهنوال سید اکرم هاشمي، د انګلیسي څانګې آمر پوهنیار محمد اصف امین، د انګلیسي ژبې او کمپیوټر زده کړو مرکز (ELCLC) مسؤل عتیق الله صافی او د انګلیسي څانګې محصل منصور د غونډې نور ویناوال وو، چې د خپلو خبرو پر مهال یې د انګلیسي ژبې د زده کړې اړتیا او اهمیت په ګوته کړ او محصلین د هغې زده کړې ته راوبلل.
