ننګرهار پوهنتون شرعیاتو پوهنځي کې د دوکتورا درېیمې دورې د باحثینو پروپوزل دفاع غونډه جوړه شوه.
د پوهنتون د مسؤلینو په وینا، په یاده غونډه کې د فقهې او قانون دوکتورا پروګرام د درېیمې دورې ۸ تنو سکالرانو له خپلو پروپوزلونو څخه په بریالي ډول دفاع وکړه.
د دفاع په یادو مراسمو کې د ننګرهار پوهنتون رئیس پوهاند دوکتور خلیل احمد بهسودوال، د علمي چارو مرستیال پوهندوی احسان الله ناصح، د فوق لیسانس برنامو آمر پوهنوال دوکتور نجیب الله صالح، د شرعیاتو پوهنځي رئیس پوهاند سید محبوب شاه هاشمي، د دوکتورا برنامې آمر پوهاند دوکتور دل آقا وقار او د یادې برنامې د بورد غړو برخه لرله.
د غونډې د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال ددې پوهنتون د شرعیاتو پوهنځي د فقهې او قانون څانګې څخه د PhD په سویه د علمي کادرونو فراغت د ننګرهار پوهنتون او ټول هېواد لپاره د ویاړ او افتخار ځای وباله او زیاته یې کړه، چې د پوهنتون اداره به د لوړو زده کړو وزارت په ملاتړ د یاد پروګرام او ورته نورو اکاډمیکو برنامو د پیاوړتیا او پرمختګ لپاره لا زیاتې هلې ځلې وکړي.
د یادونې وړ ده، چې د ننګرهار پوهنتون د شرعیاتو پوهنځي د فقهې او قانون څانګې دوکتورا پروګرام په ۱۳۹۳ لمریز کال کې رامنځته شوی، چې اوس مهال په کې ۱۰ تنه په زده کړو بوخت دي او ۱۹ تنه یې په دوه دورو کې فارغ کړي دي.
