د کرکټ بورډ له خوا پیل شویو سیالیو کې د ننګرهار پوهنتون لوبډله نیمه پایلوبې ته ووتله.
ننګرهار پوهنتون لوبډلې په پرله پسې توګه خپله درېیمه لوبه هم وګټله او په دې توګه یې د ټورنمنټ نیمه پایلوبې ته لار وموندله.
د افغانستان د کرکټ بورډ ادارې د ننګرهار څانګې له خوا په دې ولایت کې د دولتي او خصوصي پوهنتونونو تر منځ د کرکټ سیالۍ پیل شوي، چې د ننګرهار پوهنتون او نورو خصوصي پوهنتونونو او لوړو زده کړو موسسو ۸ لوبډلې په کې برخه لري.
د ننګرهار پوهنتون لوبډلې خپله لومړنۍ سیالي د غويي په ۲۴مه د روښان لوړو زده کړو موسسې سره ترسره کړه، چې یادې لوبډلې ته یې د ۳ ویکټو په توپیر ماتې ورکړه. دغه راز یې دویمه او درېیمه سیالي د غويي په ۲۵ او ۲۶مه نېټه د الفلاح پوهنتون او نیشنل کرکټ اکاډمۍ لوبډلو سره ترسره کړه، چې یادو لوبډلو ته یې د ۱۳ او ۶۳ منډو په توپیر ماتې ورکړه او په دې توګه یې د ټورنمنټ نیمه پایلوبې ته لار وموندله.
د ننګرهار پوهنتون د محصلانو چارو مرستیال پوهنوال سید اکرم هاشمي د پوهنتون لوبډلې د لوبغاړو محصلینو او د هغوی د روزونکو استادانو مننه وکړه، چې په یادو سیالیو کې یې خپله وړتیا وښودله او هغوی یې نظم، دسپلین او د سپورتي اخلاقو رعایتولو ته راوبلل.
