د ننګرهار پوهنتون ۳۶ تنه نوښتګر محصلین د یوې غونډې په ترڅ کې وستایل شول.
ننګرهار پوهنتون د خپلو اړوندو پوهنځیو ۳۶ تنه هغه محصلین، چې د چاپېریال ساتنې کمېټې په چوکاټ کې یې د پوهنتون د ښکلا، سرسبزۍ او بیا رغاونې کې فعاله ونډه اخیستې وه او ځینو یې د خپلو مسلکي او عملي زده کړو په برخه کې نوښتونه کړي وو، د یوې غونډې په ترڅ کې وستایل.
په همدې مناسبت د محصلانو خدمتونو انسجام آمریت په نوښت د پوهنتون د غونډو تالار کې ستاینغونډه جوړه شوې وه، چې د پوهنتون رئیس، مرستیالانو، د ننګرهار کانال رئیس، د پوهنتون د چاپېریال ساتنې کمېټې غړو او محصلینو په کې برخه لرله.
د غونډې د پرانیستې وینا پر مهال د ننګرهار پوهنتون رئیس شـ/ـیخ انعام الله مدني په اداره کې د مکافاتو او مجازاتو د اصل پر ارزښت خبرې وکړې او محصلينو ته يې ددې ستر وياړ له امله، چې د پوهنتون د ادارې له خوا ستایل کېږي، مبارکي وويله.
نوموړي وویل: د پوهنتون اداره او استادان هڅه کوي، چې محصلینو ته د تدریس، عملي زده کړو او ټولنیزو خدمتونو ښې زمینې برابرې کړي، چې له نېکه مرغه د همدې هلو ځلو پایله ده، چې زمونږ محصلین د پوهنتون دننه او بهر ښې لاسته راوړنې لرلي او ځلېدلي دي.
ښاغلي مدني د چاپېریال ساتنې کمېټې د مشرتابه او غړو استادانو، محصلینو، اداري او خدماتي کارکوونکو د فعالیتونو ستاینه وکړه، چې په وینا یې، په هلو ځلو سره یې د پوهنتون فزیکي بڼې مثبت تغیر کړی.
د پوهنتون رئیس د محصلانو خدمتونو انسجام آمریت مننه وکړه، چې د محصلینو د هڅونې په موخه یې یاده ستاینغونډه جوړه کړه.
د ننګرهار پوهنتون د محصلانو خدمتونو انسجام آمر قاري بشیراحمد احمدي د غونډې په موخو او اهدافو خبرې وکړې او د ستایل کېدونکو محصلینو په نوښتونو او فعالیتونو یې رڼا واچوله.
د غونډې په وروستۍ برخه کې د پوهنتون د مسؤلینو له خوا محصلینو ته برابر شوي ستاینلیکونه ورکړل شول او د محصلینو له خوا د پوهنتون رئیس، مرستیالانو او د چاپېریال ساتنې کمېټې مشر پوهنوال سید اکرم هاشمي ته د ښو کړنو او خدمتونو د ترسراوي له امله د اعزاز پګړۍ پر سر شوې.
غونډه د ننګرهار کانال د رئیس مـ/ـولوي غلام رحمن کظیم په وینا او دعا سره پای ته ورسېده.
سرچینه: د عامه اړیکو، اطلاعاتو او نشراتو آمریت
