د ننګرهار پوهنتون یو شمېر استادان او محصلین ددې پوهنتون د مشرتابه له خوا تقدیر شول.
یادو استادانو او محصلینو په ملي کچه په بېلابېلو سیالیو کې غوره مقامونه خپل کړي وو، چې د پوهنتون د مشرتابه له خوا د ستاینلیکونو او ډالیو په ورکړې سره تقدیر شول.
د ننګرهار پوهنتون د کرنې پوهنځي د درېو تنو استادانو پوهنمل نور آغا نوښت، پوهنمل نور علي نور او پوهنیار طارق الله هاشمي علمي او څېړنیزه مقاله (د سیمې (نیمروز) د کرنې په وده کې د کمال خان بند د اوبو اغېزې، اوږدمهالې ګټې او کاري لومړیتوبونه) تر سرلیک لاندې د کمال خان بند د پرانیستې په ویاړ د مقاله لیکنې په ملي سیالۍ کې د هېواد په کچه مقام خپل کړی او د ۹ غوره مقالو په ډله کې راغلې.
د یاد پوهنځي د دویم کال محصل میهن مالیار طرحې او پروژې، چې د اقلیم د بدلون په اړه وه، د برټش قونسل په هغه سیالۍ کې، چې د افغانستان د پوهنتونونو د محصلینو تر منځ د ټولنیزو ستونزو او د هغې د حل لارو په اړه د طرحو جوړولو په برخه کې جوړه شوې وه، د ۱۵۰ طرحو له منځه لومړی مقام خپل کړ، چې د یاد بنسټ په مرسته به په نږدې راتلونکې کې د ننګرهار ولایت په درېو ولسوالیو کې تطبیق شي.
د ننګرهار پوهنتون د عامه ادارې او پالیسۍ پوهنځي د محصل عبدالرحمن شفق په مشرۍ د ننګرهار او الفلاح پوهنتونونو او التقوا لوړو زده کړو موسسې محصلینو طرحې په هغه ملي سیالۍ کې، چې د کوچنیو کاروبارونو په اړه د طرحو جوړولو په برخه کې د هېواد د بېلابېلو پوهنتونونو د محصلینو تر منځ د بلخ په نخبګان پوهنتون جوړه شوې وه، د هېواد په کچه د ۴۰ طرحو له منځه دویم مقام خپل کړ.
د ننګرهار پوهنتون رئیس پوهاند دوکتور خلیل احمد بهسودوال د بېلابېلو مراسمو په ترڅ کې د یادو استادانو او محصلینو هلې ځلې وستایلې او د ستاینلیکونو او ډالیو په ورکړې سره یې تقدیر کړل.
پوهاند بهسودوال د استادانو او محصلینو بریاوې او په ملي کچه ځلېدل د پوهنتون لپاره ستر ویاړ او لاسته راوړنه وبلله.
