د ننګرهار پوهنتون مشرتابه د شرعیاتو پوهنځي د چارو لیدنه او ارزونه وکړه.
د ننګرهار پوهنتون رئیس پوهاند دوکتور خلیل احمد بهسودوال په داسې حال کې، چې د علمي چارو مرستيال پوهندوى دوکتور محمد حامد کډوال او د محصلانو چارو مرستیال پوهنوال سید اکرم هاشمي یې ملتیا کوله، د پوهنتون د اړوندو پوهنځیو د چارو د څارنې او ارزونې په لړ کې دا ځل د شرعیاتو پوهنځي د علمي او اداري چارو څخه لیدنه وکړه.
د لیدنې پر مهال پوهاند بهسودوال شرعیاتو پوهنځی د لیسانس د ورځې او شپې پروګرامونو سربېره د دکتورا او ماسترۍ د دریو برنامو په لرلو سره د ننګرهار پوهنتون له ځواکمنو پوهنځیو یاد کړ او د پوهنځي د مسؤلینو او استادانو څخه د مننې تر څنګ یې هغوی د اړوندو برنامو لا بهبود او معیاري کېدو ته راوبلل.
د پوهنتون رئیس او مرستیالانو د تضمین کیفیت د دوامدارې پروسې په معیارونو او د لوړو زده کړو وزارت د معلوماتي سیستم (HEMIS) په اساس د پوهنځي د چارو د برابرولو په اړه د پوهنځي مسؤلینو ته اړینې لارښوونې وکړې، چې د شرعیاتو پوهنځي د رئیس پوهاند دوکتور اسرارالحی منیب او د اړوندو څانګو د مسؤلینو له خوا ورته په یاده برخه کې د اړینو اجرااتو ډاډ ورکړل شو.
د مجلس په پای کې د پوهنتون مشرتابه د پوهنځي د ریاست، دیپارتمنتونو او اداري مدیریتونو چارې له نږدې وليدې او د استادانو ستونزې او وړاندیزونه یې هم واورېدل او د ستونزو د حل ډاډ یې ورکړ.
