د ننګرهار پوهنتون محصلینو له لوري جوړه شوې ډرون الوتکه نندارې ته وړاندې شوه.
د ننګرهار پوهنتون ساینس پوهنځي ریاضي څانګې څلورم ټولګي محصلینو له لوري جوړې شوې ډرون الوتکې ته نن د پوهنتون د رهبرۍ غړو، استادانو او راغلو مېلمنو په حضور کې بریالۍ ازمايښتي الوتنه ورکړل شوه.
په همدې پار د ننګرهار پوهنتون ریاست مقام کې غونډه جوړه شوې وه، چې په کې د ننګرهار پوهنتون رئیس او مرستیالانو سربېره د الوتکې جوړوونکو محصلینو او د هغوی لارښود استاد برخه درلوده.
د ننګرهار پوهنتون رئیس شـيـ/خ انعام الله مدني د ساینس پوهنځي د محصلینو د دغه نوښت او ابتکار ستاينه وکړه او دا یې د ساینس او ټکنالوژۍ په برخه کې د ننګرهار پوهنتون لپاره ستره لاسته راوړنه او پرمختګ وباله.
نوموړي یادو محصلینو ته د هر راز همکارۍ ډاډ ورکړ او سپارښتنه یې وکړه، چې د یاد صنعت په برخه کې محترک واوسي او د مختلفو نوښتونو رامنځ کولو لپاره پیاوړي مهارتونه ترلاسه کړي.
د ننګرهار پوهنتون د علمي چارو مرستیال پوهندوی احسان الله ناصح، د اداري او مالي چارو مرستیال پوهنیار قاضي خالد صداقت او د محصلانو چارو مرستیال پوهنیار حافظ سید محمد قاسم هاشمي د غونډې نور ویناوال وو، چې د یادو محصلینو هلې ځلې یې وستایلې، هغوی ته یې د هر راز سهولتونو او امکاناتو برابرولو ژمنه وکړه او زیاته يې کړه، هڅه به وکړي چې ياد محصلين په اړونده او نورو برخو کې د مسلکي او متخصصو اشخاصو سره وصل کړي تر څو ورسره په راتلونکو پروژو کې همکاري ترسره او پرمختللي اختراعات وکړي.
د ساينس پوهنځي استاد پوهنمل نور زمان باوري د غونډې پر مهال د پوهنتون رئيس او مرستيالانو ته د ډرون الوتکې په اړه هر اړخيز معلومات وړاندې کړل، د دوی له پروژو څخه يې د پوهنتون د رهبرۍ له دوامداره ملاتړ څخه مننه وکړه او ځينې وړانديزونه او اړتياوې يې هم شريکې کړې، چې د پوهنتون مشرتابه يې د پوره کولو ډاډ ورکړ.
د ساينس پوهنځي محصل عبدالباسط سمير چې د خپلو ملګرو په مرسته او د استادانو په لارښوونه يې دغه F22 ماډل ډرون الوتکه جوړه کړې وويل، ياده ډرون الوتکه يې له (کاک) کاغذ څخه د يوې مياشت په موده کې جوړه کړې او کولی شي چې تر ۵۰۰ متره ارتفاع او يو نيم کيلو متر په اوږدوالي الوتنه وکړي او د خپل وزن سربېره ۵۰۰ ګرامه وزن پورته کړي.
سرچينه: د عامه اړيکو، اطلاعاتو او نشراتو امريت
