د ننګرهار پوهنتون له لوري میرویس خان نیکه زابل لوړو زده کړو مؤسسې ته د تضمین کیفیت په برخه کې د پلان جوړونې انلاین یو ورځنی سيمینار وړاندې شو.
یاد انلاین سيمینار د ننګرهار پوهنتون علمي چارو معاونیت اړوند د تضمین کیفیت داخلي واحد مسؤل پوهنوال علي جان عادل له خوا د میرویس خان نیکه زابل لوړو زده کړو مؤسسې د تضمین کیفیت مسؤلینو ته وړاندې شو، چې پر مهال یې د تضمین کیفیت برخه کې د پلان جوړونې، معیارونو تطبیق، کیفیت ارزونې، تحصیلي برنامو پراختیا او د تضمین کیفیت پروسې مؤثریت زیاتوالي اړوند د پرېزنټېشن په شکل معلومات، تجربې او مشورې شریکې شوې.
د سيمینار د پرانیستې پر مهال د ننګرهار پوهنتون د علمي چارو مرستیال پوهندوی مولوي احسان الله ناصح د پوهنتونونو تر منځ د متقابلو علمي اړیکو په ارزښت خبرې وکړې او زیاته یې کړه: چې ننګرهار پوهنتون د هېواد په کچه د دویم ستر پوهنیز او اکاډمیک کانون په حیث د خپلو امکاناتو او علمي ظرفیتونو په لرلو سره د هېواد ټولو پوهنتونونو سره په بېلابېلو علمي او مسلکي برخو کې همکاریو ترسراوي او تجربو شریکولو ته ژمنتیا لري.
د میرویس خان نیکه زابل لوړو زده کړو مؤسسې رهبرۍ د خپلو خبرو پر مهال په تېر کې له خپلې مؤسسې سره د ننګرهار پوهنتون له همکاریو او مشورو مننه وکړه او د تضمین کیفیت سربېره یې نورو برخو کې د مرستې او همکارۍ غوښتنه وکړه، چې د ننګرهار پوهنتون لخوا ورته ډاډ ورکړل شو.
