د ننګرهار پوهنتون ساینس پوهنځي د فزیک څانګې محصلینو ۸ ډوله سنسرونه جوړ او په بریالي ډول وازمویل

یاد سنسرونه د فزیک څانګې د درېمې دورې فارغانو د پروژو دفاع پر مهال نندارې ته وړاندې شول.

د پوهنتون د مسؤلینو په وینا، د ساینس پوهنځي د فزیک له څانګې سږ کال ۴۳ تنه فارغېږي، چې ټولو یې په ورته نورو پروژو کار کړی، چې په نوبت سره به دفاع او نندارې ته وړاندې شي.

په همدې مناسبت د ساينس پوهنځي کې غونډه جوړه شوې وه، چې د ساينس پوهنځي د رئيس، استادانو او محصلينو سربېره په کې د ننګرهار پوهنتون رئيس پوهاند دوکتور خليل احمد بهسودوال او د محصلانو چارو مرستيال پوهندوى سيد اکرم هاشمي هم برخه لرله.

د پرانیستې وینا پر مهال د ساینس پوهنځي رئیس پوهندوی صفت الله شاکر د محصلینو د پروژو په اړه د غونډې برخوالو ته معلومات ورکړل.

نوموړي وویل: یاد سنسرونه، چې د لمس، محافظتي، تودوخې، اوبو اندازې او د ساده ولټ مټر سنسرونو په نوم جوړ شوي، د کورونو او نورو ځایونو د خوندیتوب لپاره ترې ګټه اخیستل کېدای شي.

ښاغلي شاکر زیاته کړه: سره له دې چې ساینس نوتاسیسه پوهنځی دی، خو د کمو امکاناتو سره سره یې محصلین زیاتې لاسته راوړنې لري.

د سنسرونو جوړوونکو محصلینو فضل الله فضلي، عبدالصمد روان او محب الله شهیر د خپلو پروژو څخه د دفاع پر مهال وویل، چې د دوی له خوا جوړ شوي سنسرونه د هېواد په کچه نوي او د نړیوالو هغو سره په توپیر جوړ شوي.

د ښاغلي فضلي په وینا، له ملګرو سره یو ځای د پوهنتون لپاره په یوه FM راډیو دستګاه او د پوهنځیو لپاره د برېښنايي محافظتي سیستم په جوړولو کار کوي او که زمینه ورته برابره شي، له دې نور زیات نوښتونه او اختراعات هم کولی شي.

د ننګرهار پوهنتون رئيس پوهاند دوکتور خليل احمد بهسودوال د محصلینو یاد ابتکارات وستایل او دا یې د ننګرهار پوهنتون لپاره لویه لاسته راوړنه وبلله.

نوموړي وویل: ((د پوهنتون دنده د مسلکي کادرونو روزنه ده، د ویاړ ځای دی، چې ننګرهار پوهنتون په کار پوه او برلاسي علمي کادرونه ټولنې ته د خدمت په موخه وړاندې کوي.))

پوهاند بهسودوال د یادو محصلینو د لارښودو استادانو پوهنمل محمد جواد نیازي او پوهنیار منصور ظاهرزي او همدارنګه د ساینس پوهنځي له مشرتابه او استادانو مننه وکړه، چې د محصلینو په روزنه کې یې نه ستړي کېدونکې هلې ځلې کړي دي او ژمنه یې وکړه، چې د پوهنځي د لابراتوارونو او نورو برخو د تجهیز په برخه کې به اړین اقدامات ترسره کړي.

د غونډې په پای کې د پوهنتون د مشرتابه له خوا درې تنه یاد مبتکر محصلین د ستاینلیکونو په ورکړې سره تقدیر شول.