د ننګرهار پوهنتون ساينس پوهنځي څخه ۴۷ تنه مسلکي کادرونه فارغ شول.
د ننګرهار پوهنتون ساينس پوهنځي جیولوجي او کانونو څانګې څخه په ۸ مه دوره کې۴۷ تنه مسلکي کادرونه فارغ او ټولنې ته د خدمت په موخه وړاندې شول.
په همدې پار د ننګرهار پوهنتون د غونډو په عمومي تالار کې د فراغت ستره غونډه جوړه شوې وه، چې د ننګرهار پوهنتون د محصلانو چارو مرستیال، ساينس پوهنځي رئيس او استادانو، فارغانو او د هغوی د کورنيو غړو په کې ګډون کړی و.
د ننګرهار پوهنتون ساينس پوهنځي رئیس پوهندوی رزدار خان په خپله وينا کې د غونډې ګډونوالو ته ښه راغلاست ووایه او زده کړییز بهیر کې یې د فارغو محصلینو هلې ځلې وستایلې.
نوموړي زیاته کړه، د یادې څانګې فارغان د دې وړتیا لري، چې له خپلې پوهې د هېواد په ابادۍ کې ګټه واخلي او د خپل مسلک اړوند په هېواد کې د شته ستونزو حل لپاره لازمې مشورې او نوې لارې چارې وړاندې کړي.
فراغت غونډې ته د وینا پر مهال د ننګرهار پوهنتون د محصلانو چارو مرستیال مولوي عبیدالله عابد فارغانو ته مبارکي وویله او هغوی یې راتلونکي کې د نورو لوړو زده کړو او ځانګړو علمي او تخنیکي مهارتونو ترلاسه کولو ته وهڅول.
د نوموړي په خبره جيولوجستان د هېواد ځمکنيو منابعو مديريت، معدنونو مسلکي استخراج او د خپل مسلک اړوند نورو برخو جوړښت کې اساسي رول لري او پکار ده، چې نوي فارغ ځوانان د عصري ټکنالوژۍ زده کړې او ورڅخه په ګټې اخیستنې مسلکي نوښتونه وکړي.
غونډه د پوهنتون او پوهنځي رهبرۍ غړو او استادانو له خوا فارغانو ته د سندونو په ورکړې او دعا سره پای ته ورسېده.
سرچینه : د اطلاعاتو، نشراتو او عامه اړيکو امريت
