د ننګرهار پوهنتون رهبرۍ ددې پوهنتون د طب پوهنځي له روانو چارو څخه لیدنه وکړه.
د ننګرهار پوهنتون رئیس، د علمي چارو او محصلانو چارو مرستیالانو د طب پوهنځي روانې علمي، تدریسي او اداري چارې له نږدې ولیدې او مسؤلینو ته یې د چارو سمون او لا زیات مؤثریت اړوند لازم هدایات وکړل.
د ننګرهار پوهنتون رئیس شیخ انعام الله مدني په یاد پوهنځي کې د روانو چارو او خدمتونو ارزونې وروسته مسؤلین خپلو دندو ته متوجه کړل او د محصلینو عملي زده کړو پیاوړتیا، کړنو ښه تنظیم او ورڅخه پر وخت نظارت اړوند یې هغوی ته سپارښتنې وکړې.
د پوهنتون رئیس وویل: استادان باید د ورځني پلان له مخې د علمي معیارونو سره سم تدریس وکړي او درسي ساعت ته پوره اماده ګي ولري.
ښاغلي مدني د یاد پوهنځي روانې چارې د پام وړ وبللې او ویې ویل، چې د پوهنځي ټاکلو اهدافو ته د رسېدنې لپاره باید لا زیات کار او هلې ځلې ترسره شي.
د ننګرهار پوهنتون د علمي چارو مرستیال پوهندوی مولوي احسان الله ناصح او د محصلانو چارو مرستیال پوهنیار حافظ سید محمد قاسم هاشمي خپلو خبرو کې د طب پوهنځي پرمختګ لپاره په کارونو کې همغږي او تعهد اړین وباله او د پوهنځي مسؤلینو ته یې د نصاب اړوند نیمګړتیاوو اصلاح، د استادانو او محصلینو مسلکي پوهې لوړاوي، څېړنیزو فعالیتونو پراختیا او د علاقې له مخې چارو ترسراوي اړوند لارښوونې او سپارښتنې وکړې.
د طب پوهنځي رئیس پوهنوال محمد عظیم عظيمي د پوهنتون رهبرۍ ته ډاډ ورکړ، چې په دوامداره توګه به د پوهنځي چارو بهبود لپاره نه ستړي کېدونکي فعالیتونه ترسره کړي.
