د ننګرهار پوهنتون تضمين کيفيت عمومي کمېټې غړو ته د ظرفيت لوړونې ۳ ورځنی ورکشاپ پيل شو.
ياد ورکشاپ ددې پوهنتون د علمي چارو معاونيت په نوښت او د تضمين کيفيت آمريت له لوري پيل شو، چې پر مهال به يې ګډونوالو ته د تضمين کيفيت د اعتبار ساتنې معيارونه او علمي پروګرامونه تفسير او تشريح شي.
د ورکشاپ په پرانيسته کې د ننګرهار پوهنتون د رئيس شـيخ انعام الله مدني سربېره د علمي چارو مرستيال پوهندوی مولوي احسان الله ناصح، د اداري او مالي چارو مرستيال پوهنيار قاضي خالد صداقت او د محصلانو چارو مرستيال پوهنيار حافظ سيد محمد قاسم هاشمي ګډون کړی و، چې د خپلو ويناوو پر مهال يې دا ډول ورکشاپونه د تحصیلي بنسټونو د کیفیت لوړولو په برخه کې ډېر مهم وبلل.
د پوهنتون مشرتابه د یادې کمېټې غړو ته سپارښتنه وکړه، چې ورکشاپ کې فعال ګډون وکړي، د هغې د محتوا مسایل په ښه شکل زده او خپلو اړونده ساحو کې د تطبیق تر څنګ یې د پوهنځي مسؤلینو او استادانو سره شریک کړي.
نوموړو د ننګرهار پوهنتون د چارو کيفيت په لوړاوي او اعتبار اخيستلو برخه کې د تضمین کیفیت پخواني آمر پوهنوال رضوان الله ممله وال هلې ځلې وستايلې او نوي آمر پوهنوال علي جان عادل ته یې د ښه راغلاست تر څنګ په چارو کې د برياليتوب دعا وکړه.
د یادونې وړ ده، چې د ورکشاپ د تدریس چارې ددې پوهنتون د استاد پوهنوال رضوان الله ممله وال لخوا پر مخ وړل کیږي.
سرچینه: د اطلاعاتو، نشراتو او عامه اړیکو آمریت
