د ننګرهار پوهنتون او په افغانستان کې د اندونیزیا سفارت تر منځ د ګډو همکاریو تفاهملیک لاسليک شو.
د مسؤلينو په وينا، د ياد تفاهملیک له مخې به ننګرهار پوهنتون او د اندونیزیا هېواد ځینې پوهنتونونه په علمي، تدریسي، څېړنو، تحصيلي بورسونو او نورو برخو کې ګډ کار او متقابله همکاري کوي.
یاد تفاهملیک د ننګرهار پوهنتون د رئيس پوهاند دوکتور خليل احمد بهسودوال او په افغانستان کې د اندونیزیا هېواد سفیر ډاکټر عارف رحمن له خوا د ویډیویي کنفرانس له لارې په داسې حال کې لاسلیک شو، چې د ننګرهار پوهنتون د علمي چارو مرستیال پوهندوی دوکتور محمد حامد کډوال، د پوهنتون د بهرنیو اړیکو کمېټې مسؤل پوهنمل دوکتور محمد دوست صافي او د اندونیزیا سفارت استازي عبدالحمید صافي هم حضور درلود.
په افغانستان کې د اندونیزیا سفیر ډاکټر عارف رحمن ننګرهار پوهنتون د افغانستان دویم ستر پوهنیز مرکز یاد کړ، چې په وینا یې، د اندونیزیا هېواد پوهنتونونه ورسره د متقابلو علمي همکاریو لرلو لیوالتیا لري.
نوموړي د دوکتورا او ماسترۍ په برخو کې ۵ تحصیلي بورسونه د پوهنتون مشرتابه ته وسپارل او زیاته یې کړه، چې په راتلونکې کې به دا لړۍ نوره هم دوام پیدا کړي.
د ننګرهار پوهنتون رئیس پوهاند دوکتور خلیل احمد بهسودوال د پوهنتونونو او علمي مرکزونو تر منځ د متقابلو اړیکو او همکاریو پر ارزښت او اړتیا خبرې وکړې او په افغانستان کې یې د اندونیزیا له سفارت مننه وکړه، چې د افغاني پوهنتونونو سره مرسته او همکاري کوي.
