د ننګرهار پوهنتون انجنیري پوهنځي څخه ۶۵ تنه علمي کادرونه فارغ شول.

د ننګرهار پوهنتون انجنیري پوهنځي د اوبو زیرمو او چاپېریال ساتنې انجنیري څانګې څخه په۷ مه دوره کې ۶۵ تنه علمي کادرونه فارغ او ټولنې ته د خدمت په موخه وړاندې شول.
په همدې پار د انجنیري پوهنځي د غونډو په تالار کې مراسم جوړ شوي وو، چې په کې د ننګرهار پوهنتون د علمي چارو او محصلانو چارو مرستیالانو، د انجنیري پوهنځي رئیس، د بېلابېلو پوهنځیو استادانو، فارغانواو د هغوی د کورنیو غړو برخه اخیستې وه.
د ننګرهار پوهنتون انجنیري پوهنځي رئیس پوهنمل محمد اجمل ستانکزي د خپلو خبرو پر مهال د غونډې ګډونوالو ته ښه راغلاست ووایه او زده کړییز بهیر کې یې د فارغو محصلینو هلې ځلې وستایلې.
نوموړي زیاته کړه: فارغ محصلین ددې وړتیا لري، چې د اوبو سرچینو مؤثره مدیریت په برخه کې اړوندو ارګانونو سره همکاري ترسره کړي او د چاپېریالي ستونزو حل لپاره لازمې مشورې او نوې لارې چارې وړاندیز کړي.
فراغت غونډې ته د وینا پر مهال د ننګرهار پوهنتون د علمي چارو مرستیال پوهندوی مـــ/ـــولوي احسان الله ناصح فارغانو ته مبارکي وویله او هغوی  یې د نورو لوړو زده کړو او ځانګړو علمي او تخنیکي مهارتونو ترلاسه کولو ته وهڅول.
د نوموړي په خبره، انجنیران د هېواد په ابادۍ، تخنیکي پرمختګ، ځمکنیو منابعو سالم مدیریت، اوبو مهار، چاپېریالي محافظت او نورو برخو جوړښت  کې اساسي رول لري او سپارښتنه یې وکړه، چې فارغ محصلین باید د هېواد هر اړخیز پرمختګ او د ټولنې د افرادو رفاه په موخه مُثمره  کړنې ترسره کړي.
د پوهنتون د علمي چارو مرستیال زیاته کړه، نظام د افغانستان اقتصادي پرمختګ او په ځانګړي ډول د اوبو مدیریت برخه کې د هېواد مسلکي او متخصصو ځوانانو جذب ته ژمنتیا لري او هیله یې وښوده، چې د فارغو محصلینو لپاره به کاري فرصتونه برابر شي. 
غونډه محصلینو ته د ستاینلیکونو په ورکړې سره پای ته ورسېده.
سرچینه : د عامه اړیکو، اطلاعاتو او نشراتو آمریت