د ننګرهار پوهنتون اداري کارکوونکو ته د کیفیت لوړاوي پروسې او د اداري اصلاحاتو د ارزونې فورمونو د تشریح یو ورځنی ورکشاپ دایر شو.
یاد ورکشاپ، چې د کارکوونکو چارو امریت اړوند د وړتیا لوړونې لوی مدیریت له خوا د بېلابېلو برخو امرینو او مدیرانو ته دایر شو، پر مهال یې د کیفیت لوړاوي او اعتبار ساتنې پروسې په ارزښت او اهمیت تفصیلي وینا وشوه او د اداري اصلاحاتو د ارزونې فورمونو فني ډکولو او اداره کې د مؤثره فعالیتونو ترسراوي لارې وښودل شوې.
د ورکشاپ روزونکي د ننګرهار پوهنتون د کیفیت لوړاوي او اعتبار ساتنې داخلي واحد مسؤل پوهنمل حنیف الله باوري او د کیفیت لوړونې او اعتبار ساتنې عمومي مدیر بختي مولا سیدي وو، چې د یادو موضوعاتو په تړاو یې پراخه علمي او مسلکي معلومات ارایه او د ګډونوالو پوښتنو ته ځوابونه وویل.
