د ملي مصالحې عالي شورا پلاوي د ننګرهار پوهنتون مشرتابه، استادانو او محصلینو سره ولیدل
د پلاوي د غړو په وینا، له یادې لیدنې یې موخه د سولې په برخه کې د ملي اجماع جوړېدل او په یاده پروسه کې د ټولنې د بېلابېلو قشرونو د نظرونو او مشورو اخیستل دي.
د انجنیر حزب الله فکري په مشرۍ یاد لس کسیز پلاوي د مرغومي په ۱۱مه د ننګرهار پوهنتون په ریاست مقام کې ددې پوهنتون د رئیس پوهاند دوکتور خلیل احمد بهسودوال، محصلانو چارو مرستيال پوهندوى سيد اکرم هاشمي، د سولې مرکز مشر پوهندوى نعيم جان سروري، د یو شمېر پوهنځيو رئيسانو، استادانو او محصلینو سره ولیدل.
د ننګرهار پوهنتون رئیس پوهاند دوکتور خلیل احمد بهسودوال راغلي پلاوي ته د ښه راغلاست تر څنګ د ملي مصالحې عالي شورا ددې ابتکار ستاینه وکړه، چې د سولې په اړه د ملي اجماع رامنځته کېدو په خاطر د ټولنې د بېلابېلو قشرونو نظرونه او وړاندیزونه راټولوي او یاده چاره یې په هېواد کې د پایدارې سولې د رامنځته کېدو لپاره اړین او اغېزمن ګام وباله.
پوهاند بهسودوال د ټولنیزې سولې په ټینګښت کې د پوهنتونونو او علمي مرکزونو د رول او اغېزمنتیا په اړه رڼا واچوله او په یاده برخه کې یې د ننګرهار پوهنتون سولې مرکز د ترسره کړیو فعالیتونو په اړه راغلي پلاوي ته معلومات ورکړل.
د راغلي پلاوي مشر انجنیر حزب الله فکري ننګرهار پوهنتون د هېواد د سترو علمي او اکاډمیکو مرکزونو له ډلې یو مهم مرکز یاد کړ، چې په وینا یې، د سولې، ملي پخلاینې او نورو ملي پروسو په بریا او پیاوړتیا کې رغنده رول لوبولی شي.
نوموړي وویل: ننګرهار پوهنتون، چې د سولې فعال مرکز او د ټولنیزې سولې د ټینګښت په برخه کې کافي تجربه لري، له مشورو او وړاندیزونو به یې د طرحو په جوړولو کې کار واخیستل شي.
د غونډې په دویمه برخه کې د مجلس برخوالو استادانو، محصلینو او د سولې مرکز غړو د سولې پروسې د بریا او ساختار په اړه خپلې طرحې، نظرونه او وړاندیزونه له راغلي پلاوي سره شریک کړل او له هغوی یې غوښتنه وکړه، چې د سولې په روان بهیر کې دې علمي مرکزونه ښکېل او له تجربو او ظرفیتونو دې یې ګټه واخیستل شي.
