د لوړو زده کړو وزارت د تضمین کیفیت او اعتبار ورکولو ریاست ارزوونکي پلاوي د ننګرهار پوهنتون کلنۍ بیاکتنه او ارزونه ترسره کړه.
د ارزوونکو یاد اته کسیز پلاوی د لوړو زده کړو وزارت د تضمین کیفیت او اعتبار ورکولو رئیس استاد شاکر وحیدي په مشرۍ د مرغومي په ۲۵مه نېټه ننګرهار پوهنتون ته راغلی ؤ، چې د یوې اوونۍ په موده کې یې ددې پوهنتون د اړوندو پوهنځیو، څانګو او دیپارتمنتونو، علمي پروګرامونو، ژورنالونو، فوق لیسانس برنامو، اداري، تدریسي او نورو بېلابېلو برخو لیدنه او ارزونه وکړه.
د ارزونې په پای کې راغلي پلاوي د ننګرهار پوهنتون د مشرتابه او د پوهنځیو او تدریسي روغتون رئیسانو سره مجلس وکړ او د ترسره شوې ارزونې ابتدایي راپور او سپارښتنې یې ورسره شریکې کړې.
د راغلي پلاوي مشر استاد وحیدي د ننګرهار پوهنتون د مشرتابه، استادانو او اداري کارکوونکو مننه وکړه، چې د بشپړ اکاډمیک اعتبار لرونکي پوهنتون په توګه یې د تضمین کیفیت پروسه د معیارونو سره سمه تطبیق کړې او په یاده برخه کې یې زیات کار کړی دی.
نوموړي زیاته کړه، په ډېرو کمو مواردو کې ځینې نیمګړتیاوې موجودې وې، چې هغه به د نهایي راپور په ترڅ کې د پوهنتون له ادارې سره د پوره کېدو په موخه شریکې کړي.
د ننګرهار پوهنتون رئیس او مرستیالانو د خپلو خبرو پر مهال د لوړو زده کړو وزارت د تضمین کیفیت ریاست د کاري ټیم او راغلي پلاوي مننه وکړه، چې د ارزونې په ترڅ کې یې دوی خپلو نیمګړتیاوو ته ځیر کړل او زیاته یې کړه، چې د ننګرهار پوهنتون رهبري، استادان او ټول منسوبین د تضمین کیفیت ملي پروسې ته ژمن دي او په پوره تعهد او ژمنتیا سره به د یادې ملي پروسې د معیارونو په رڼا کې د پوهنتون د علمي او تدریسي کیفیت د ښه والي او د بشپړ اکاډمیک اعتبار ساتلو لپاره هلې ځلې وکړي.
