د لوړو زده کړو وزارت د تدریسي روغتونونو ارزوونکي پلاوي د ننګرهار پوهنتون مشرتابه سره ولیدل.

د کابل پوهنتون رئیس دوکتور اسامه عزیز په مشرۍ د لوړو زده کړو وزارت اړوند د ټولو پوهنتونونو د تدریسي روغتونونو د اړتیاوو او وړتیاوو د تثبیت په موخه ټاکل شوي ۵ کسیز هیئت ننګرهار پوهنتون ته د سفر په ترڅ کې ددې پوهنتون مشرتابه سره ولیدل.
د لیدنې پر مهال دوکتور عزیز د خپل سفر د موخو په اړه د ننګرهار پوهنتون مشرتابه ته معلومات ورکړل او زیاته یې کړه، چې د خپل کاري ټیم په ملتیا به د ننګرهار پوهنتون تدریسي روغتون وړتیاوې تثبیت او د اړتیاوو په اړه به یې راپور چمتو او لوړو زده کړو وزارت مقام سره شریک کړي.
د ننګرهار پوهنتون رئیس شیخ انعام الله مدني راغلي پلاوي ته د ښه راغلاست تر څنګ د لوړو زده کړو وزارت مقام او د پلاوي له غړو مننه وکړه، چې ننګرهار پوهنتون ته راغلل او ددې پوهنتون د تدریسي روغتون ارزونه کوي.
ښاغلي مدني ننګرهار پوهنتون تدریسي روغتون د هېواد یو له مجهزو روغتونونو یاد کړ، چې د محصلینو د عملي زده کړو ترڅنګ د ختیځ او ټول هېواد ولسونو ته روغتیايي خدمتونه وړاندې کوي.
نوموړي زیاته کړه، چې د راغلي پلاوي ارزونه به د روغتون د خدماتو عرضې په برخه کې بهبود رامنځ ته کړي او چارې به یې د پخوا په پرتله لا زیاتې ښې او ګړندۍ شي. 
د یادونې وړ ده، چې د ننګرهار پوهنتون تدریسي روغتون په ۱۳۴۴ هـ ش کې تاسیس شوی، ۲۵۵ بستره،۱۲ څانګې لري او په ۷ څانګو کې د تخصص برنامه لري.