د افغان مراد خصوصي لېسې زده کوونکو له ننګرهار پوهنتون څخه لیدنه وکړه.
ننګرهار کې د افغان مراد خصوصي لېسې (۴۰) تنو زده کوونکو د یو علمي سفر په ترڅ کې ننګرهار پوهنتون څخه لیدنه وکړه او ددې پوهنتون اړوند معلومات یې ترلاسه کړل. راغلو زده کوونکو ته د ننګرهار پوهنتون د محصلانو خدمتونو همغږۍ امریت مسؤلینو له خوا د پوهنتون پېژندنې پرېزنټېشن وړاندې شو او د پوهنتون اړوند د زده کوونکو پوښتنو ته ځوابونه وویل شول. د ننګرهار پوهنتون د محصلانو خدمتونو همغږۍ آمر قاري بشیر احمد احمدي زده کوونکو سره د غونډې پر مهال په خپله وینا کې پوهنتون د ښوونځي زده کوونکو لپاره د هغوی د علمي ارمانونو د تحقق اساسي ځای یاد کړ او راغلي زده کوونکي یې وهڅول، چې راتلونکي کې د خپلې خوښې پوهنتون ته د کامیابېدو او خپلو استعدادونو ځلولو لپاره دې د ښوونځي زده کړو کې نه ستړې کېدونکې هلې ځلې وکړي. د افغان مراد لېسې یادو زده کوونکو په خپلو خبرو کې د پوهنتون ادارې او محصلانو خدمتونو همغږۍ امریت مسؤلینو څخه مننه وکړه، چې ورته یې د علمي سیر او پوهنتون لیدنې زمینه برابره کړه. د غونډې په پای کې زده کوونکو د ننګرهار پوهنتون مختلفو برخو څخه لیدنه وکړه، چې د مسؤلینو له لوري ورته معلومات ورکړل شول.
