د کیفیت لوړاوي او اعتبار ورکولو د نوي چوکاټ د ۱۱ ګونو معیارونو د تفسیر او توضیح درې ورځنی ورکشاپ پای ته ورسېد.
یاد ورکشاپ د ننګرهار پوهنتون د علمي چارو معاونیت په نوښت د کیفیت لوړاوي او اعتبار ساتنې مرکزي کمېټې غړو ته د کیفیت لوړاوي او اعتبار ورکولو د نوي چوکاټ د ۱۱ اصلي او ۴۱ فرعي معیارونو د تشریح او تفسیر په موخه جوړ شوی ؤ.
د یاد ورکشاپ روزونکی د ننګرهار پوهنتون وترنري علومو پوهنځي رئیس پوهنوال رضوان الله ممله وال و، چې ګډونوالو ته یې د نوي چارچوب مطابق د پوهنتون علمي، اداري، تخنیکي او نورو برخو اړوند د هر معیار موخې، د ارزونې میتودونه او د پلي کېدو لارې په تفصیل سره تشریح او روښانه کړل.
د ننګرهار پوهنتون د علمي چارو مرستیال پوهنوال مولوي احسان الله ناصح په خپله وینا کې وویل، د کیفیت لوړاوي او اعتبار ورکولو پروسه د هرې ادارې او تحصیلي بنسټ د اعتبار، بقا او پرمختګ اساس جوړوي او یو سازمان هغه وخت معیاري کېدای شي، چې فعالیتونه یې د ټاکلو او واضحو معیارونو پر بنسټ ولاړ وي.
ښاغلي ناصح صاحب د ورکشاپ ارایه کوونکي استاد څخه د مننې ترڅنګ زیاته کړه، چې دا نوی چوکاټ موږ ته د دې زمینه برابروي، چې خپل فعالیتونه له نړيوالو معیارونو سره سم کړو، د پوهنتون کمزوري او ځواکمن نقاط دقیق تحلیل کړو او د دوامدار پرمختګ لپاره منظم پلانونه جوړ کړو.
د ورکشاپ په پای کې ګډونوالو د خپلو پوهنځیو د کیفیت لا پیاوړتیا او د اکاډمیک اعتبار ساتنې ژمنه وکړه.
