وترنري علومو پوهنځي خپل ۱۵ تنه ممتاز محصلین وستایل.
د ننګرهار پوهنتون وترنري علومو پوهنځي فرهنګي کمېټې د بېلابېلو څانګو (۱۵) تنه هغه محصلین، چې د تېر سمستر نهايي ازموینو په پایله کې یې د خپلو ټولګیو او پوهنځي په کچه لوړې نومرې اخیستې وې، د یوې غونډې په ترڅ کې وستایل.
په همدې پار وترنري علومو پوهنځي کې ستاینغونډه جوړه شوې وه، چې په کې د ننګرهار پوهنتون مرستیالانو، استادانو، محصلینو او د هغوی د کورنیو غړو برخه لرله.
غونډې ته د ښه راغلاست وینا پر مهال د وترنري علومو پوهنځي مرستیال پوهنمل حنیف الله باوري د پوهنتون له رهبرۍ مننه وکړه، چې د محصلینو ستاینې او تشویق په موخه یې غونډه کې ګډون کړی.
د ننګرهار پوهنتون د محصلانو چارو مرستیال پوهنیارحافظ سید محمد قاسم هاشمي، د څېړنو او علمي مجلو مرستیال پوهندوی دوکتور سعید محمد وقار او د اداري او مالي چارو مرستیال مُفتي نعمت الله اعزازي په خپلو خبرو کې د یادو محصلینو استعدادونه وستایل او هغوی یې د پیاوړي تحصیلي نظام جوړوونکي او د ټولنې علمي پانګه وبلله.
نوموړو محصلین لا زیاتو علمي کوښښونو، مطالعې او ځان جوړونې ته وهڅول او ژمنه یې ورسره وکړه، چې د پوهنتون اداره به یې علمي پرمختګ ته زیاته پاملرنه وکړي او د معیاري زده کړو امکانات به ورته برابر کړي.
د ستاینغونډې په پای کې د پوهنتون مرستیالانو، پوهنځي مسؤلینو او استادانو محصلینو ته ستاینلیکونه، مډالونه او نغدي جوایز ورکړل.
