د خصوصي پوهنتونونو د دعوت او ارشاد مسؤلینو او مبلغینو سره د چارو لا ښه والي په موخه غونډه وشوه.
د ننګرهار پوهنتون رئیس شیخ انعام الله مدني په هدایت د دې پوهنتون د دعوت او ارشاد آمر مولوي اعجاز الحق زَلِف په ننګرهار کې مېشتو د بېلابېلو خصوصي پوهنتونونو د دعوت او ارشاد مسؤلینو او مبلغینو سره غونډه وکړه او هغوی سره یې د لوړو مقاماتو لارښوونې او سپارښتنې شریکې کړې.
یاده غونډه چې په امیر علي شېر نوايي پوهنتون کې ترتیب شوې وه، پر مهال یې د دندو لایحو او ټاکلو اصولو له مخې اداري کارونو په وخت ترسراوي، درسي حلقاتو ته پاملرنې زیاتوالي، محصلینو ته د افتخاري شیوخ کرامو په مرسته دیني او علمي سيمینارونو برابرولو، د ذیروح انځورونو لمنځه وړلو، دفترونو کې په پرتو فرشونو بوټونو او څپلیو سره د ګرځېدلو مخنیوي، دیني او اصلاحي درسونو کې د کارکوونکو او محصلینو پراخه حضور، د امربالمعروف ریاست محتسبینو سره په چارو کې همغږۍ او یو شمېر نورو مسایلو او موضوعاتو په هکله بحث وشو او په اړه یې پرېکړې وشوې.
په پای کې د غونډې ګډونوالو په یادو برخو کې د لازمو اجرااتو ترسره کولو ډاډ ورکړ او همدارنګه یې خپل وړاندیزونه او غوښتنې شریکې کړې.
سرچینه: د اطلاعاتو، نشراتو او عامه اړیکو امریت
