د لوړو زده کړو وزارت د تقرر او ترفیعاتو کمېسون خپله اوونیزه نوبتي غونډه ننګرهار پوهنتون کې وکړه.
د کمېسون د غړو په وینا، له یاد مجلس یې موخه د هېواد د اکاډمیکو بنسټونو تر منځ د یووالي او همغږۍ رامنځته کول او د ملي روحیې پیاوړتیا ده.
د لوړو زده کړو وزارت د تقرر او علمي ترفیعاتو کمېسون خپله اوونیزه نوبتي غونډه د ننګرهار پوهنتون د تقرر او علمي ترفیعاتو کمېټې سره په ګډه د حمل په ۱۵مه نېټه په یاد پوهنتون کې ترسره کړه.
په نوموړي مجلس کې د لوړو زده کړو وزارت او ننګرهار پوهنتون د تقرر او علمي ترفیعاتو کمېسون د غړو او مسؤلینو تر څنګ د ننګرهار پوهنتون رئیس پوهاند دوکتور خلیل احمد بهسودوال، د علمي چارو مرستیال پوهندوی دوکتور محمد حامد کډوال او د محصلانو چارو مرستیال پوهنوال سید اکرم هاشمي هم برخه لرله.
د ننګرهار پوهنتون رئیس پوهاند دوکتور خلیل احمد بهسودوال د مجلس پرانیسته وکړه او راغلي پلاوي ته د ښه راغلاست تر څنګ یې له هغوی مننه وکړه، چې د مجلس لپاره یې ننګرهار پوهنتون وټاکه.
پوهاند بهسودوال د ننګرهار پوهنتون په استازیتوب د یاد کمېسون د کړنو او فعالیتونو ستاینه او قدردانی وکړ، چې د ننګرهار پوهنتون په ګډون د ټولو پوهنتونونو د علمي کادر غړو د تقرر او ترفیعاتو په برخه کې یې ترسره کوي.
د کمېسون د غړو په استازیتوب د کابل پوهنتون د فزیک پوهنځي رئیس او استاد پوهاند زلمي احمدزي خبرې وکړې. نوموړي ننګرهار پوهنتون له کابل پوهنتون وروسته دویم ستر علمي او تاریخي کانون یاد کړ.
پوهاند احمدزي وویل: دا لومړی ځل دی، چې د لوړو زده کړو وزارت د تقرر او علمي ترفیعاتو کمېسون د یاد وزارت څخه بیرون غونډه کوي او مونږ خوښ یو، چې دا ویاړ د ننګرهار پوهنتون په برخه شو.
نوموړي د ننګرهار پوهنتون د کوربتوب او مېلمه پالنې مننه وکړه او زیاته یې کړه، چې له یاد اقدام څخه یې موخه د هېواد د اکاډمیکو بنسټونو تر منځ د یووالي او همغږۍ رامنځته کول دي.
د غونډې په وروستۍ برخه کې د لوړو زده کړو وزارت او ننګرهار پوهنتون د تقرر او علمي ترفیعاتو کمېسونونو غړو په ګډه د هېواد د بېلابېلو پوهنتون د تقرر او علمي ترفیعاتو ۲۰ کیسونه بررسي کړل او د وروستیو کړنو په موخه یې اړوندو څانګو ته محول کړل.
