د ننګرهار پوهنتون له شرعياتو او کمپیوټر ساینس پوهنځيو څخه (۲۸۵) تنه مسلکي کادرونه فارغ شول.
په همدې مناسبت د ننګرهار پوهنتون په ایډیټوریم او ستاره شرق تالار کې بېلابېلې غونډې جوړې شوې وې، چې په کې د ننګرهار پوهنتون د رئيس او مرستيالانو سربېره د پوهنځيو رئيسانو، استادانو، دیني علماء کرامو، اداري کارکوونکو، فارغانو او د هغوی د کورنيو غړو برخه لرله.
د فارغو شویو له ډلې ۱۱۵ تنه د شرعياتو پوهنځي له فقې او قانون او اسلامي تعلیماتو او ۱۷۰ تنه د کمپیوټر ساینس پوهنځي له معلوماتي سیستمونو، معلوماتي ټکنالوژۍ او سافټویر انجنیري څانګو څخه فارغ او ټولنې ته د خدمت په موخه وړاندې شول.
د غونډو ښه راغلاست ویناوو پر مهال د ننګرهار پوهنتون شرعیاتو پوهنځي رئیس مولوي کلیم الله حقاني او د کمپیوټر ساینس پوهنځي رئیس پوهندوی بادام نیازي په خپلو خبرو کې د فارغو محصلینو په علمي وړتیاوو، روزنې پروسې او راتلونکو مسؤلیتونو خبرې وکړې او د پوهنتون رهبرۍ او نورو مېلمنو ته یې ښه راغلاست ووایه.
فراغت غونډو ته په خپلو ویناوو کې د ننګرهار پوهنتون رئيس شيخ انعام الله مدني، د علمي چارو مرستیال پوهندوی مولوي احسان الله ناصح او د ختیځ زون امارتي او خصوصي پوهنتونونو لپاره د لوړو زده کړو وزارت د دعوت او ارشاد ریاست استازي او د ننګرهار پوهنتون د محصلانو چارو مرستیال شیخ شاکر الله وحدت فارغانو ته د مبارکۍ تر څنګ وویل، الله تعالی چې چاته د خیر اراده وکړي نو علم او پوهه ورکوي او دا د خوښۍ ځای دی، چې په دومره تعداد کې مسلکي او علمي کادرونه ټولنې ته د خدمت په موخه وړاندې کېږي.
د نوموړو په وینا، اوسمهال تر بل هر وخت ځوانانو ته په ملي او نړیواله کچه د زده کړو فرصتونه او اسباب برابر دي چې کولی شي، په معیاري ډول خپل ظرفیتونه لوړ او د تخصص له لارې د هېواد او امت لپاره د ښه خدمت جوګه شي.
د پوهنتون رهبرۍ محصلین وهڅول، چې له فراغت سره سم د ننګرهار پوهنتون په فوق لیسانس برنامو کې خپل راتلونکي علمي سفرونه پیل او د ټولنې اړتیاوو او ستونزو ته د علمي حل لارو موندلو سربېره د خلکو په منځ کې د خپل پوهنتون او پوهنځي ښه استازیتوب وکړي.
د فارغانو په استازیتوب یو شمېر محصلینو هم خبرې وکړې، چې په خپلو خبرو کې یې د الله تعالی د شکر ادا کولو تر څنګ د تحصیلي دورې پر مهال د خپلو استادانو، والدینو او مشرانو له صادقانه ملاتړ او زحمتونو قدردانی وکړ.
غونډې فارغانو ته د تصدیقونو په ورکړې او دعا سره پای ته ورسېدې.
