ننګرهار پوهنتون اقتصاد پوهنځي سره د لمریزې برېښنا سیستم مرسته وشوه.
یاده مرسته، چې۸۰ سولر تختې، دوه عدده انورټر او نور اړین وسایل په کې شامل دي او د نصبولو سره یې مجموعي ارزښت ۶۰۰ زره افغانۍ کېږي، د یاد پوهنځي د ماسترۍ دورې د برحالو او فارغو محصلانو له خوا د پوهنځي د ادارې سره وشوه.
مرسته شوي وسایل د اقتصاد پوهنځي د ماسترۍ دورې د فارغو محصلانو یار احمد جمال او جمیل شینواري له خوا د ننګرهار پوهنتون د رئیس پوهاند دوکتور خلیل احمد بهسودوال او د محصلانو چارو مرستیال پوهنوال سید اکرم هاشمي په حضور کې د اقتصاد پوهنځي رئیس پوهنوال محمد زبیر نورمل ته وسپارل شول.
پوهاند بهسودوال د اقتصاد پوهنځي د ماسترۍ دورې د محصلانو او فارغانو د دې نېک اقدام ستاینه وکړه او د مننې تر څنګ یې د پوهنتون په نورو فارغانو هم غږ وکړ، چې په معنوي او مادي برخه کې د خپل پوهنتون ملا وتړي او په دې برخه کې خپل مسؤلیت او رسالت ادا کړي.
د اقتصاد پوهنځي رئیس پوهنوال محمد زبیر نورمل د خپلو محصلینو او فارغانو مننه وکړه، چې د خپل روزنځي ستونزې په خپله حلوي او زیاته یې کړه، چې یاد سیستم به د پوهنځي په نوې ودانۍ کې ځای پر ځای کړي، چې په نصب سره به یې د ودانۍ د برېښنا ستونزه تر ډېره بریده حل شي.
