د ننګرهار پوهنتون اداري او تقرر او انفکاک مجلسونه ددې پوهنتون د رئيس پوهاند دوکتور خليل احمد بهسودوال په مشرۍ ترسره شول.
په نوموړو کاري ناستو کې، چې د پوهنتون د علمي چارو مرستيال پوهندوى دوکتور محمد حامد کډوال، د محصلانو چارو مرستيال پوهنوال سيد اکرم هاشمي، د اداري او مالي چارو مرستیال مسعود پیروزي، د پوهنځيو او تدریسي روغتون رئيسانو او اداري آمرينو په کې برخه لرله، د پوهنتون د مالي، اداري، استادانو تقرر او ځینو نورو مسايلو په اړه بحث او پرېکړې وشوې.
د مجلس په پیل کې د البیروني پوهنتون د شهیدو شویو استادانو او دغه راز د لوړو زده کړو د کورنۍ ټولو هغو استادانو روح ته، چې په دې وروستیو کې د کرونا ناروغۍ له امله وفات شوي وو، د دعا لاسونه لپه شول او د پېښې ټپیانو ته د عاجلې روغتیا غوښتنه وشوه.
د مجلس د پرانیستې وینا پر مهال د ننګرهار پوهنتون رئیس پوهاند دوکتور خلیل احمد بهسودوال په اداري او تحصیلي برخو کې د لوړو زده کړو وزارت د داخلي تفتیش سپارښتنې د مجلس له غړو سره شریکې کړې او په یادو برخو کې د شته ستونزو او نیمګړتیاوو د له منځه وړلو په اړه یې د پوهنځیو او اداري شعباتو مسؤلینو ته جدي سپارښتنې وکړې.
پوهاند بهسودوال د کرونا ناروغۍ د وقایوي او احتیاطي تدابیرو په اړه مسؤلینو ته اړینې لارښوونې وکړې او غوښتنه یې وکړه، چې د ورځنیو چارو پر مهال دې د عامې روغتیا وزارت سپارښتنې په نظر کې ونیول شي.
د اداري او مالي چارو مرستیال مسعود پیروزي د تدارکاتي پروسو د چټکوالي د ترتیب شوي لارښود په اړه د مجلس غړو ته معلومات ورکړل او په پای کې د یو لړ نورو متفرقه مسایلو په اړه بحث او پرېکړې وشوې.
د تقرر او انفکاک مجلس اجنډا د نوموړي مجلس د منشي پوهندوی سید سمیع الله سعیدي له خوا د مجلس له غړو سره شریکه شوه، چې له مخې یې د ننګرهار، لغمان، نورستان او لوګر پوهنتونونو او لوړو زده کړو موسسو د علمي کادر د تقرر ۱۰ کیسونه مطرح او تر بحث او پرېکړو وروسته د بعدي اجرااتو په موخه اړوندو څانګو ته محول شول.
