د ننګرهار پوهنتون محصلینو (د اقلیم بدلون نړیوال کنفرانس کې د افغانستان د ګډون اړتیا، فرصتونو او اغېزو) په اړه خپل چمتو کړي سيمینارونه ارایه کړل.
یاد سيمینارونه، د حقوقو او سیاسي علومو پوهنځي ۱۵ تنو محصلینو له خوا د دې پوهنځي د استاد پوهنوال شمس الاسلام شمس صافي په لارښوونه د محصلینو تر منځ د جوړ شوي رقابتي کنفرانس په ترڅ کې ارایه شول.
د دې رقابتي سیالۍ پر مهال محصلینو په یاد نړیوال کنفرانس کې د افغانستان د ګډون اړتیا، فرصتونو او اغېزو اړوند سیاسي، حقوقي، اقتصادي او چاپېریالي اړخونه وڅېړل.
په همدې پار جوړه شوې غونډه کې د ننګرهار پوهنتون د علمي چارو، محصلانو چارو، څېړنو او علمي مجلو مرستیالانو سربېره د حقوقو او سیاسي علومو پوهنځي رئیس، استادانو، د ننګرهار ولایت د چاپېریال ساتنې رئیس، اداري آمرینو او ګڼو محصلینو برخه لرله.
غونډې ته د وینا پر مهال د ننګرهار پوهنتون د علمي چارو مرستیال پوهندوی مولوي احسان الله ناصح او د محصلانو چارو مرستیال پوهنیار حافظ سید محمد قاسم هاشمي افغانستان د اقلیم بدلون زیانونو څخه اغېزمن او متضرر هېواد وباله او د صنعتي فابریکو پراخه فعالیتونه، معدنونو غیرې مسلکي استخراج، د افرادو محیطي سرغړونې او د طبیعي منابعو تخریبول یې د اقلیم بدلون اساسي عوامل یاد کړل.
د پوهنتون مرستیالانو د اقلیم بدلون منفي اغېزو مخنیوي او یاده برخه کې افغانستان ته د نړیوالو پاملرنې راجلبولو اړوند د ننګرهار پوهنتون د ترسره کړو هڅو یادونه وکړه.
نوموړو د حقوقو او سیاسي علومو پوهنځي د یاد ابتکار ستاینې تر څنګ له هغوی مننه وکړه، چې محصلین د نړیوالو ننګونو پر وړاندې چمتو او باخبره روزي او محصلینو ته یې سپارښتنه وکړه، چې د داسې مهمو نړیوالو مسایلو په اړه خپله پوهه پراخه، څېړنې ترسره او د اړتیا پر مهال خپل غږ پورته کړي.
د ننګرهار ولایت د چاپېریال ساتنې ادارې رئیس حافظ احسان الله مختار په خپله وینا کې افغانستان له ډېرې مودې راهیسې د اقلیم بدلون جدي ننګونو سره مخ او یاده برخه کې له جوړو شويو نړیوالو کنفرانسونو څخه لیرې ساتل شوی هېواد وباله او پر دې یې خوښي وښوده، چې د اسلامي امارت تر حاکمیت وروسته افغانستان تېر کال په نومبر میاشت کې د ناظر په توګه د اقلیم بدلون په نړیوال کنفرانس کې ګډون وکړ.
نوموړي په دوامداره توګه نړیوالو کنفرانسونو کې د افغانستان حضور د اقلیم بدلون منفي اغېزو مخنيوي او ستونزو حل برخه کې مهم وباله او زیاته یې کړه، چې دا به وکولی شي چې افغانستان کې د اقلیم بدلون ناوړه اغېزو حقیقي انځور نړیوالو ته وړاندې او هغوی مشترکې مبارزې او همکارۍ ته وهڅوي.
د غونډې په دویمه برخه کې ټاکل شویو ۱۵ تنو محصلینو خپل چمتو کړي موضوعات ارایه کړل، چې د ارزوونکي هیئت له لوري مثبت ارزیابي شول.
د یادونې وړ ده، د اقلیم بدلون نړیوال کنفرانس (COP30) چې ټاکلې شوې د روان میلادي کال نومبر میاشت په ۱۱ مه د برازیل په بیلم ښار کې پیل او د نومبر تر ۲۱ مې نېټې به دوام وکړي، د اقلیم بدلون پر وړاندې د نړیوالو هڅو د ارزونې او پیاوړتیا په موخه دایرېږي.
